Minister Dangui Oduber: Trahadonan di Jeugdzorg no por dicidi unda nan kier bay

Despeus di a cuminsa nan protesta, a entrega carta na Management Team di Salubridad Publico, e grupo di trahadonan di Jeugdzorg di Salubridad Publico a entrega un Manifiesto na Minister encarga Dangui Oduber.

Esaki a tuma luga awe, diaranson, den oranan tempran di mainta. E mandatario a sali pafo pa ricibi e Manifiesto for di e empleadonan. E documento aki ta resumi e motibonan pakico nan a dicidi di bay accion aworaki, un aña y 4 luna despues cu a saca nan for di e anterior edificio primintiendo un solucion cu nunca a yega. Nan ta papia di nan preocupacion cu scolnan ta habri y nan mester cuminsa cu nan campañanan na scolnan, cual lo no por sosode pasobra nan materialnan ta un caminda y nan ta ubica un otro caminda. Esaki y otro programanan cu mester cuminsa, no ta sigui pa e motibo aki mes.  Por ehempel, nan tin 1700 vacuna balora na 36 mil florin pa campaña escolar y Wit Gele Kruis. Tur esaki ta caduca dia 30 di september, 2019. Pues ta materialnan cu ta bay perde si no wordo uza prome cu e fecha di vencemento.

Trahadornan di DVG wardando mas cu un aña a bati na porta di minister Dangui Oduber

Posted by 24ora on Wednesday, August 14, 2019

P’esey nan ta urgi Minister pa ubica nan den un edificio cu ta cla caba y cu por ubica e grupo di 20 empleado, den un termino corto pa nan por sigui cu nan trabou valioso pa hobennan y e futuro generacion. Si den 48 ora no haya un contesta satisfactorio, ta haya nan mes obliga di informa tur scolnan cu nan campaña di vacunacion escolar lo wordo posponi.

Minister Danqui Oduber a bisa cu e ta na altura di e situacion aki y ta lamenta cu e trahadonan ta sali protesta di e forma aki, pasobra a haci un palabracion pa un solucion cu no ta completamente den nan mannan. Gobierno ta prepara e edificio den cual kier muda e servicio aki, y el a compronde for di e doño cu e trabounan ta basta avansa.

El a bisa tambe cu trahadonan no por determina unda nan kier bay “y esey ta sosode awor. E trahadonan kier un edificio, nan a scoge un edificio y nan ta bisa cu eyden nan kier bay.   “Mi ta compronde cu nan tin e necesidad, nan tin e preocupacion y e urgencia. Pero imaginabo cu tur trahado di Gobierno a bisa nan kier un edificio cu nan a mira cu ta comodo y cu eyden nan kier wordo ubica. Gobierno ta dicidi unda su empleadonan ta bay traha.” Ta parce, segun e mandatario a bisa, ambos edificio ta mesun caminda. Un ta cla caba y e otro mester wordo drecha. Gobierno a scoge pa esun cu mester wordo drecha.

E mandatario a bisa cu ta berdad e empleadonan a sali un aña y cuatro luna for di nan edificio, pero cu no mester lubida cu e edificio aki  si decadencia ta pa aña. “Por culpa e Gobierno aki cu no a percura pa tin un oficina adecuado, pero e edificio pa añas ta den estado di decadencia. Nos a bisa tambe cu e decision aki ta temporalmente pasobra ta bay ubica nan den un edificio cu ta cumpli cu tur e exigencia cu nan como trahado ta stipula pa cumpli cu nan trabou manera debe ser. E doño di e edificio a priminti nos cu esaki lo ta cla.”

Awor Gobierno ta bay mira ki dia e edificio por wordo entrega “Nos ta depende di e contractistanan cu mester entrega nan trabou.”

Dia 5 di juli ultimo e mandatario a reuni cu e doño di e edificio, segun el a bisa, y a informa e persona cu e caso ta urgente. Nan a compromete cu e edificio lo ta cla pa ora aña escolar nobo habri. “Si esey no a wordo cumpli, obviamente e no ta den nos man. A urgi e doñonan pa keda cla.”

ATA aworaki ta den un edificio cu ta huur di SOGA, pero e pensamento ta pa muda ATA pa ex edificio di DOW. Di e forma aki henter e espacio ta keda liber y un parti di esaki ta bay wordo ocupa pa Jeugdzorg. Si esey bira un realidad, e lo bira algo a termino largo. Pero mester yega na un palabracion cu Minister di Infrastructura pa tuma e edificio over.

Sra. Sharon Everts, vocero di e trahadonan,  a bisa cu tabatin un palabracion si esun no ta cla, pa yega na un otro solucion. Pero no a cumpli cu esaki.

Comments

comments