Royal Power Tat Fat Home Depot ta derota Macuarima Spark Elektra 6-4 y ta titula Campeon AA 2019

Campenato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a jega na su final den categoria AA masculino momento cu Royal Power Tat Fat Home Depot ta derota Macuarima Spark Elektra 6-4 den nan ultimo wega y ta “sweep” e serie final 3-0.

Macuarima ta pika ariba 1-0 den cabez di promer inning contra e pitcher habridor Kelvin Silvania. Royal Power ta reaciona mesora riba Carlos Croes y ta empata e wega 1-1. Macuarima ta rally pa dos careda mas pa bay ariba 3-1. Den bom di 4 inning Royal Power ta responde cu 3 careda mientras Macuarima no ta baha cabez y ta score 1 careda den cabez di 6. Royal Power finalmente ta logra gana e wega 6-4 y ta celebra nan campeon invicto den AA. Royal Power 6 careda, 8 hit, 1 error y ta laga 6 coredor na base.

Macuarima 4 careda, 5 hit, 3 error y ta laga 12 coredor den circulacion. Mihor bateadornan pa Royal Power ta Guyon Cannister di 2-2 cu 3 careda impuha cu hitnan oportuno, Eldrick Dijkhoff, Kelvin Silvania, Mitchel Martis y Giandrick Lacle tur a bay di 2-1 cu un doblete, Aigil Brete a bay di 3-1. Pa Macuarima a destaca na bate Carlos Croes di 3-2 cu dos careda impuha, Ray Bernabela di 2-2 y Michael Fingal di 3-1. Jair Thompson ta drenta den tercer entrada relevando Kelvin Silvania y ta seya e victoria riba su nomber. Kelvin Silvania a bay 3 inning enfrentando 20 bateador, tirando 41 bola, 38 strike pa un total di 79 pitch permitiendo 3 careda tras di 3 hit regalando 7 base por bola ponchando 4 bateador. Jair Thomspon ta enfrenta 17 bateador ponchando 9 di nan tirando 27 bola, 47 strike pa un total di 74 lansamento. Jair ta permiti 1 careda tras di 2 hit y 2 base por bola.

Carlos Croes di Macuarima Spark Elektra mester conforma su mes cu e derota enfrentando 30 bateador tirando 37 bola, 59 strike pa un total di 96 pitch permitiendo 6 careda tras di 8 hit mas 3 base por bola propinando solamente 1 strike out. Cu e resultado aki Royal Power ta celebra un otro titulo di campeon den fast pitch AA aki na Aruba. Pabien na Royal Power, Pabien na Macuarima, pabien na e deporte di softball cu ta super activo den 2019. Danki na tur cu a aporta tanto veldnan, dirigentenan di directiva y esnan cu ta na warda cada wega, umpires, scorers  HEINEKEN y Subsidie Commissie.

 

Comments

comments