E siman cu a pasa, minister Glenbert Croes a toca tema di e maneho di ontheffing. Esaki tabata un di e cosnan cu un otro minister a wordo investiga riba dje. Awo e minister actual a pone un management team, pero el a dicidi pa tuma cierto decisionnan pa loke ta e maneho.
A cuestiona e minister anterior, pasobra e tabata firma ontheffing y cu awe por ta hendenan rond di dje, kico lo ta resultado di e caso, cu e tabata tin e poder, siendo cu mester a lag’e den man di DPL. Awor aki Minister Croes a trek in esaki y e mes ta bay firma ontheffing. E cosnan aki ta bolbe trece preguntanan cu mañan por bolbe cuminsa cu speculacionnan etc. cu por tin consecuencia pa e minister mes su maneho, su credibilidad, etc.
Riba esaki, Minister Glenbert Croes a splica cu e sa di e preocupacion eynan. E minister di AVP den e gabinete anterior, ta corupto. Kico ta pasa, e tabata tin hendenan cu tabata coopera cun’e. E tabata tin un organisacion criminal di corupcion cu tabata coopera cun’e pa efectua e corupcionnan aki.
Kico ta pasa
Minister Glenbert Croes, ta un minister di MEP. E no ta corupto segun e ta bisa. E ta exigi di tur hende pa brinda un servicio honrado, honesto. Hasta ora cu e minister nombra un management team y ta e management team, cu el a nombra y nan a haci algo cu e no ta di acuerdo cun’e, e ta tuma medida. Nan por ta un management team cu el a nombra, pero e ta tuma medida si tin algo cu segun su consideracion, ta suficiente serio pa tuma medida, cual e minister a haci.
E minister a menciona cu gran mayoria di tur e trahadonan di DPL ta trahadonan honrado, y nan tur tin su apoyo. E minister tabata tin reunion cu autoridad. Tin dos caminda pa cana. E caminda hudicial y e caminda disciplinario. E camindanan lo wordo cana pa algun trahado cu tin bista riba nan.
Tambe el a manda un mensahe di SEPPA, tur e trahadonan lo tin su apoyo, pero e realidad ta cu e kier pa esnan compronde cu esnan cu ta hecha baina, cu hasta contra e management team, e lo tuma medida y tambe contra trahadonan cu ta haci nan mes culpabel si nan haci cosnan cu no ta bon.
Loke a sosode den e ultimo añanan aki bao di maneho di gobierno di AVP, e minister di labor di AVP, ta algo cu minister Croes di MEP no lo bay tolera ni acepta ni rond di dje.
No tin hende cu a sponsor MEP den campaña por pone presion riba dje pa e haci algo incorecto.
E minister a agrega cu e unico hende cu por tuma un decision pa haci algo incorecto, ta e mes. E ta comprometi na sirbi nos pais, e partido, pueblo den forma digno, door di actua den forma honrado, traha honesto, corecto den su conducta, den su proceder como minister di Asuntonan Social y labor, pa no cay den baina.
Tur hende rond di dje, asina leu cu e sa, ta honrado. E management team a comete un fout cu e minister, pa cual el a tuma medida. Tin señalnan di cierto figuranan di trahado di DPL, cual ta un kliek chikito. E problema di corupcion ta mas grandi cu simplemente cu e ministerio di Asuntonan Social y Labor.
Si e minister ta na altura di cierto cosnan cu ta tumando luga, bao di ningun circunstancia e minister ta bay tolera of acepta pa e cosnan ey. E lo keda sin actua. Si e tuma e autoridad di DPL, e ora e minister ta bira corupto? E minister mes ta bisa, wordo informa di cosnan cu ta tuma luga y no actua? E minister ta opta pa actua contra bainanan cu a tuma luga den e ultimo 4 añanan bao di minister di AVP. Minister Croes no ta acepta esaki.
