Minister Geoffrey Wever a anuncia un concurso cu ta duna oportunidad na pueblo di Aruba honra un baluarte di e ciudad di Oranjestad, door di nombra un e plasa nobo. E plaza ta keda na e crusada di Wilhelminastraat y Columbustraat, un luga conoci y frecuenta den e ciudad pa local y turista.
Gobierno di Aruba ta busca proposicionnan cu ta celebra y reconoce un baluarte (persona of simbolo importante) di Oranjestad. Ta importante cu bo proposicion ta algo cu ta resona cu e comunidad local y cu e tin un nificacion profundo pa e habitantenan di e ciudad y pa e bishitantenan tambe. Si bo tin un idea pa un nomber cu ta satisface e criterianan abou menciona, bo mester registra. Tin un formulario obtenibel na Bestuurskantoor (Cocolishi) of online via link disponibel riba Minister Geoffrey Wever su pagina social. Pa por participa mester tene cuenta cu e siguiente reglanan;
Directiva y criterio: Tin un maximo di dos palabra pa e nomber di plasa someti. Nomber mester ta original (sin infringi derecho di autor) y mester refleha cultura, historia of nificacion di Oranjestad. Nombernan controversial, of topiconan no ta permiti. Ta tene cuenta cu facilidad di pronunciacion y memorisacion.
Participacion y eligibilidad: Tur hende cu ta interesa por participa den e concurso aki. Personanan cu ta haci sugerencia mester ta mayor di edad (18+). Ta tuma solamente un proposicion pa persona den consideracion.
Hunto cu bo registro, bo mester manda bo proposicion. Bo por prepara un argumento convincente cortico pa bo eleccion di nomber, detayando pakico e ta adecuado y/of con ta honra e cultura y historia di Oranjestad. Peticion pa un nomber di caya of plasa mester wordo haci na e Comision di Nomber di Caya pa por ricibi un apoyo, e.o. e habitantenan na e sitio mester a wordo consulta. E principionan cu e “straatnaamcommissie” ta mantene na ora di nombra un caya of plasa tras di un persona, ta lo siguiente:
1) E persona mester a fayece caba of ta mas bieu cu 85 aña
2) E persona cu ta wordo nombra mester a duna un contribucion relevante na e comunidad.
3) E persona en cuestion mester a traha trabou di boluntario cu ta beneficia e comunidad, y no pasobra esaki tabata su trabou of cu e lo a cobra di dje.
4) E persona mester ta un uno respeta den e comunidad y tin afiliacion fuerte cu Oranjestad.
5) Nombernan di caya existente no lo wordo cambia.
Na banda di un premio chikito, e ganado di e concurso lo tin e satisfaccion di sa cu a scoge nan proposicion como e nomber permanente di e plaza, un honor duradero y un contribucion significativo na e patrimonio cultural y social di Oranjestad.
