E situacion di aumento di schoolgeld sigur tabata tema di preocupacion cerca hopi mayor y a probecha pa puntra Minister di Enseñansa, Endy Croes riba e echo aki, dicon a aumenta esaki asina drastico.
Primeramente EPB, SKOA, etc., ta fundacion cu un minister no por dicidi pa nan. Scolnan di DPS, sigur lo no a aumenta. Pero kico a conduci te aki, ta cu e fundacionnan ta haya un financiamento di gobierno, a traves di un normbedrag, yama exploitatiesubsidie. Lamentablemente na momento cu Croes a drenta, e ultimo aña cu a tuma e decision pa aumenta e normbedrag, cual ta cubri 7 componente, cual ta un di nan ta leermaterial, ta desde 2009, unda cu e ultimo a traha e ultimo rapport.
SCHOOLGELD A DUPLICA
EPB ta duplicando su schoolgeld p’e aña escolar nobo y tambe e scolnan di MAVO.
Sigur ta un reto p’e mayornan y dificilmente por manda tur mucha bay studia na un scol publico.
Minister Endy Croes a indica den transcurso di aña enseñansa lo bay ta innovando. Y si kier bay cu innovacion e tin un costo mara na dje.
Ley ta bisa cu cada tres aña ta traha, unda cu un normbedrag ta wordo estableci den un rapport. E ultimo rapport oficial tabata na 2009 cu a drenta na vigor na 2010, cual tabata e ultimo ahuste.
Pa mas di 10 aña no a ahusta e normbedrag di acuerdo cu ley. E minister a laga haci un investigacion preliminar, treciendo dilanti cu mester ahusta e normbedrag cu 6.4 miyon florin cu no tin si kier igual’e.
