Tin hende cu a bati na porta di abogado Chris Lejuez, pa asina mustra un defensa legal riba e situacion di kiosconan riba Welcome Plaza. E ta conta cu tin carta cu a wordo saca for di e ministerio awor aki pa personanan cu a cera un contracto cu Gobierno. E Kiosconan nan ta huur. Ta un huur contract nan tin. E huurcontractnan aki a wordo firma poco tempo prome cu gobierno a cambia. E gobierno nobo aki, e minister actual a bisa si, cu esey no ta bon. El a roep in e nietigheid, el a declara e contractnan aki invalido, pasobra e ta bisa cu nan a haci’e na ultimo ora, djis pa stroba e gobierno nobo di yega na contract cu personanan cu e ta desea. Berdad ta cu esey no ta asina. Berdad ta cu, por ehempel un persona cu tres aña pasa caba, na 2015, a haci un peticion pa haya un kiosco na huur. El a manda e carta pa gobierno. Gobierno a tuma e carta y un aña despues, na 2016, el a manda ripiti e carta pa e minister di e tempo ey, pidi e minister atrobe si e por a dun’e un chens pa e huur un di e kiosconan ey.

E minister a bay di acuerdo cu esey na fin di 2016 y a duna opdracht na e instancianan concerni, na e departamento concerni, pa traha un huurcontract cu e persona aki, pa e huur un kiosco na Welcome Plaza. A tuma hopi tempo prome cu e contracto aki a bin cla. Y e contracto a bin cla poco tempo prome cu e cambio di gobierno a tuma luga. Pero no ta asina si cu el a wordo haci na ultimo ora. Tabata tin mas cu 2 aña caba ta trahando riba dje y ultimo ora tabata e firmamento di contract a tuma luga. No tabata trata di un caso nobo. Tin ora ta bisa cu ora un gobierno demisionario, no por tuma decision den asuntonan nobo. Pero esaki tabata un asunto bieu y un lopende zaak, cu tabata andando pa mas do 2 aña. Ta e ehecusion so a tuma luga na ultimo ora.

E persona a haya carta di e minister ter nietigheid. Lejuez a manda un carta pa gobierno pa bisa cu esaki no ta cay bao di tipo di casonan manera cu ta yama afscheidsbeleid, esta un gobierno cu ta stroba un otro gobierno di funciona. Esey ta loke ta pasando.

Deadline

Tin un deadline. Den e carta nan a pone un deadline pa entrega e yabinan di e luga. Saca tur su pertenencianan y entrega e yabinan. Conseho tabata pa no haci esey pasobra e abogado ta mira e contracto aki totalmente valido. E abogado a indica pa no entrega nada. Loke a wordo haci eynan no ta na su luga pa un minister, despues cu tabata tin mas cu dos aña ta andando pa haya un kiosco pa huur, porfin a logra bin haya e kiosco, awo e minister cu a sinta nobo, ta bay busca manera pa sak’e sin mas di e luga. Conseho tabata cu no ta sali. Si en caso pa bin pa saca e persona, pa yama Lejuez.

Pia pa para riba dje

Abogado Lejuez a splica cu e persona aki tin mas cu 2 aña cu el a pidi y minister mas cu un aña pasa a bay di acuerdo cu e peticion. Tur loke mester a wordo haci ta traha e contracto. No ta asina cu e decision a cay awor aki na ultimo ora. E decision tabata tey caba di hopi tempo pasa. Hopi tempo prome cu eleccion y campaña. Dos aña prome cu tabata tin eleccion. No por bisa cu esaki tabata haci na ultimo ora of afscheidsbeleid. Ta un caso unda a pidi gobierno pa haya un kiosco pa huur. Gobierno a tuma su tempo, a duna un contract. Prome a bisa cu lo hay’e, despues a firma cu e huurdo. No tin nada malo na dje. No tin nada ilegal na dje. No tin ningun motibo pa cancela e contracto aki.

Honra

Segun abogado Lejuez, e minister cu a honra e persona cu a haya e kiosco, tabata e ex minister di infrastructura, Benny Sevinger y awo e minister cu ta purbando pa kita e contracto, bisando e cu e no por keda eynan, cu e tin cu sali pasobra e contracto lo ta invalido, ta e minister actual di infrastructura y medio ambiente, Otmar Oduber.

Contesta di minister

Lejuez a haya un contesta, unda cu e minister ta bisa cu e ta para riba e punto cu e tin pa nan entrega e yabi y desaloha e luga. Probablemente mester bay corte si bin un otro forma pa sacanan afo. E cliente di Lejuez no lo bay corte, pasobra no tin motibo. Si nan bin pa sak’e, of si nan ta insisti cu e mester entrega yabi, naturalmente e mester acudi cerca hues. Abogado Lejuez su interpretacion di loke a pasa ta cu aparentemente e interpretacion cu nan ta duna na un decision cu hof a yega di tuma basta tempo pasa na un caso di St. Maarten, no ta cuadra cu e realidad aki. No ta asina cu a tuma un decision na ultimo ora di un gobierno pa stroba e otro gobierno. Ta un decision cu a wordo tuma pa un gobierno, a base di un decision cu a tuma luga hopi tempo pasa y nan a cumpli cun’e.