Minister Danqui Oduber: Cannabis Recreacional nos no ta habri p’e

Den combersacion cu Minister di Salubridad Publico a bini dilanti e tema di Cannabis y expresionnan haci door di Ricardo Croes, lider di RED. E ultimo aki ta sinti cu no ta cumpliendo cu palabracion haci cu su persona y su partido riba e tema di Cannabis. E mandatario sinembargo a enfatisa cu e unico aspecto cu haci un palabracion riba dje ta pa introduci of legalisa Cannabis medicinal.

Recientemente, e mandatario a bisa, el a entrega un “Startnota” cu a keda aproba den su totalidad den Conseho di Minister. “E ta sirbi tambe como Memorie van Toelichting pa cuminsa cu e proceso pa bini cu un ley nobo di Cannabis Medicinal. Na mas cu un ocasion mi a pone enfasis riba e hecho cu loke nos ta bay haci ta legalisa Cannabis Medicinal, productonan cu no ta contene un THC (Tetrahydrocannabinol) halto y esnan cu tin e THC  lo mester bay bou control di un dokter di cas, cu ta duna e receta pa bay Botica. Na e Botica ta busca un pildo cu ta contene e THC y no e yerba.“

Minister Danqui Oduber: Cannabis Recreacional nos no ta habri p’e

Minister Danqui Oduber: Cannabis Recreacional nos no ta habri p’e. Click link pa mas https://24ora.tv/2Y6NXTH

Posted by 24ora on Monday, July 22, 2019

E mandatario a bisa tambe cu e no sa na cual wega Ricardo Croes ta referi na dje, pasobra ta un Gobierno y un programa tin. Croes, el a enfatisa, ta hopi bon na altura di e proceso cu Gobierno ta canando riba e tema aki. “E tema aki no ta un tema di Ricardo Croes, pero di Gobierno di Aruba pasobra nos a pone esaki den nos Programa di Gobernacion. E no ta un tema dimi tampoco y mi ta simplemente ehecutando e Programa di Gobernacion cu tres partido a cumbini cu otro ora nos a drenta Gobierno.”

Aworaki e “Startnota” ta bay cana su caminda na e instancianan cu ta duna conseho pa despues bay Parlamento y mira si e ta haya aprobacion. E ley aki ta cla caba y Gobierno ta kere cu prome cu fin di aña e mester yega Parlamento. El a enfatisa cu e proceso tabata uno habri y cu tur miembro di Conseho di Minister ta na altura di dje, inclusive e Minister di RED. “No tabatin ningun secrecia den e proceso cu tabata uno habri. Parlamento ta bay haya informacion riba e tema aki. E Minister di RED tabata completamente di acuerdo cu e proceso. E tabata hopi contento cu e Nota aki cu a keda presenta.”

Na final Minister Dangui Oduber a bisa cu nunca a menciona Cannabis Recreacional pero si a papia di Cannabis Medicinal. “Tanten cu ami ta Minister Cannabis Recreacional no ta pasa. Nos ta habri pa Cannabis Medicinal, pasobra e ta bon pa comunidad, hopi hende lo beneficia di dje. Pero Cannabis Recreacional nos no ta habri p’e.”

Comments

comments