Cuido medico mester ta garantisa pa tur hende cu ta biba na Aruba. Sinembargo tin un preocupacion. A priminti un solucion na e preocupacion aki cu no a yega. E preocupacion cerca pashentnan di cancer ta birando cada dia mas grandi. Tambe e ta yegando na oido di esnan cu tabata den gobernacion y cu awe tambe ta den oposicion cu ta tendiendo e dolor den comunidad.
Mike Eman ta un di nan cu a tende kico ta pasando. Ta sinti cu tin un ausencia di oncologonan awor aki. Lider di AVP, den un declaracion duna dilanti Hospital, a comenta cu ta conviviendo cu pashentnan pa loke ta trata oncologia. Tin un preocupacion hopi grandi den nos comunidad, pasobra na luna di maart, tabata na hospital, hunto cu pashentnan cu mester trato hopi specialisa di un oncologo, y hustamente na e momento ey tabata den un lucha pa mira si por logra convence gobierno pa dr. Jonkhoff por keda Aruba, mirando cu tabatin un diferencia di opinion cu hospital.
Kico ta pasa
Dr. Jonkhoff na e momento ey tabata e ultimo oncologo permanente cu tabata tin na Aruba y tabata teme cu e lo a bay. Si no bin un oncologo permanente na su luga, pashentnan mester wordo trata cada bes pa un medico diferente. Sigur e ta afecta e calidad di trato y tambe e confiansa cu e pashent mester tin hustamente den e momentonan mas dificil di su bida.
“Hopi inkietud y preocupacion pa e pashent y su famia. Un dokter permanente semper toch ta mira mas cos y ta duna e trankilidad tambe necesario. Pa bo cura, bo mester dos cos. Mester trato adecua specialisa, pero bo mester e trankilidad tambe pa bo curpa por resisti tur locual e mester resisti pa por supera un malesa dificil manera ta cancer.”
Eman ta sigui bisa cu tabata den discusion y a presenta e pensamento cu gobierno mester intermedia pa Jonkhoff keda. Hospital y gobierno a sali bisa cu Jonkhoff lo wordo reemplasa di biaha y no tin ningun problema.
Amigoe a saca un articulo na maart, reaccionando riba loke cu Eman a bisa, unda cu den e articulo minister Dangui Oduber ta bisa cu no ta bay tin problema, y lo bay tin continuidad. Awo ta resulta cu den luna di juli, augustus y september, no ta bay tin un oncologo mes na Aruba pa trata e pashentnan y desde cu Jonkhoff a bay, no tin uno oncologo permanente.
Cada biaha un otro dokter ta atende e pashentnan y esey no ta bon pa e pashentnan. A papia cu hopi pashent, y nan tin hopi inkietud. P’esey Eman tabata para hunto cu e pashentnan pa vocifera e preocupacion aki y duna tambe responsabilidad na Gobierno cu a bisa na maart cu nan lo percura pa un reemplaso di biaha pa dr. Jonkhoff. “Awe nan mester realisa cu no ta facil pa por reemplasa un oncologo y no mester a lag’e bay y haci loke un gobierno ta haci, intermedia cu e hunta di directiva di hospital pa busca un solucion pa evita cu cosnan cana den direccion cu awe ta asina leu cu e pashentnan di cancer no tin e trato adecua cu nan tin mester na Aruba.”
E politico ta haya esaki un preocupacion grandi y ta considera e responsabilidad pa comunidad ta na altura di e situacion y pa hunto expresa e inkietud pa cambia e direccion aki mas rapido posibel, segun Eman.
