Scouting Aruba tabata tin un dagcamp diasabra ultimo unda tabata tin un intercambio di dashi, unda cu tur e gruponan cu ta participa, cual ta Casibar Cacique, Santanero, Oscar Romero y St. Jacintus ta cambia nan dashi pa contingente Aruba.
Segun contingent leidster, Carolina Croes esaki ta e di 15 Caburee na Jamaica, cualnan ta bay ta anfitrion. E prome cu Aruba a bay tabata na Corsou, despues a bay esun di Suriname, tres aña pasa na Guyana y awo na Jamaica. E participantenan ta bay keda 10 dia na Jamaica, caminda nan ta bay conoce mas miembro di scouting. Otro siman diadomingo dia 28 di juli nan ta biahando te cu dia 6 di augustus.
Ta gradici tur esnan cu a sa di yuda cu fundraising, of cu di un forma of otro a yuda p’asina e hobennan por bay Jamaica e aña’ki.
Segun Christopher Lake, Hoofdcommissaris, e welpnan a traha pa varios luna den preparacion pa por capacita nan mes y pa nan bay experencia aventura na Jamaica. Tin un delegacion di 16 welp ta bayendo. Pa por a yega na e culminacion, a tuma un serie di preparacion, entre otro a organisa diferente fundraising. Tabata tin caminata, food sale, tabata tin sponsornan cu a contribui, pa cual ta hopi gradicido. Asina ey a logra, hunto cu e contribucion di e mayornan, pa e muchanan por a cumpli cu e suma cu ta rekeri pa participa den e evento aki.
Lake ta gradici tur esnan cu a yuda Scouting pa e muchanan por a yega na bay experencia e Caburee. Ta gradici tambe tur mayor e confiansa cu nan a pone den e staff dinamico di e lidernan. Awo ta na e punto caminda e muchanan ta cla pa bay representa Aruba na Jamaica, cu e diferente otro welpnan di e diferente paisnan di Caribe. Esaki sigur ta un tremendo culminacion di un proyecto exitoso mas di Scouting Aruba.
