Minister Dangui Oduber a informa comunidad cu diamars den Parlamento di Aruba lo bay trata e Landsverordening beperking tabaksproducten. Ta un ley existente cu tempo a drenta gobierno a mira na 2017 cu mester a bin algun cambio. Ta e ley cu ta regarda prohibicion di humamento den area publico pa den pensamento di departamento di Salud Publico.
Tempo cu a trata e ley aki y aproba den Parlamento e no tabata un ley completo. Mester a haci algun cambio, cual a haci tambe. Cambio haci tabata un trayecto cu e ley mester a cana. Sinembargo e ley a yega parlamento y lo ta trata den un reunion publico diamars.
Cambio mas importante den ley ta cu lo bin un prohibicion di humamento den area publico. Edad pa cumpra sigaria lo aumenta di 18 pa 21 aña. Lo prohibi bendemento di sigaria los, manera cu t’e caso aworaki, caminda cu por bay un supermercado y cumpra sigaria los.
Lo ofrece proteccion na menor di edad, cu por ehempel si gara un mayor ta huma den compania di un menor di edad, lo tin un multa p’esaki.
T’e cambionan di mas grandi y si tur cos ta bon diamars lo aproba e ley aki den parlamento y lo drenta na vigor.
Ta considera e ley aki un importante den cuadro di e plan nacional di prevencion lansa pa Gobierno aña pasa den luna di maart 2020. Intencion tabata pa implementa y ehecuta e plan nacional di prevencion aki. Lamentablemente e pandemia a presenta y a haci cu no por a implementa y ehecuta e plan manera desea.
Intencion ta awo pa hunto cu e ‘stuurgroep’ y tur stakeholder bay enfoca riba prevencion di salud, cu campaña di conscientisacion. Tambe kier bin cu un clinica di obesitas na hospital, proyecto piloto cu lo cuminsa pronto. Tin cu bay inverti den prevencion pa por tin un comunidad mas saludabel, baha mortalidad y percura pa tin un fondo di AZV cu ta sostenibel pasobra simplemente tur proyeccion cu tin awor aki ta dificilmente cu por mantene AZV sostenibel mirando cu tin embehecimento y un comunidad cu lamentablemente no ta esun mas saludabel.
Como ministerio di salud, e tarea ta pa inverti den prevencion no solamente cu palabra pero cu accion concreto, pa di e forma aki, den algun aña mira e resultadonan cu ta move mas, cu ta come mas saludabel, cu por garantisa cu e pakete cu ta brinda na e aseguradonan, por keda brinda esey por medio di e plan nacional di prevencion cu pronto lo anuncia.
Pa cobertura mas amplio lesa edicion di TREMPAN mañan.
