Diaranson dia 6 di november ultimo Minister Plenipotenciario na Hulanda sr. Guillfred Besaril hunto cu diferente funcionario di Arubahuis tabata presenta na e clausura di e minor Koninkrijkszaken di De Haagse Hogeschool.
E minor Koninkrijkszaken ta un iniciativa di e faculteit di rechten, bestuurskunde y integrale veiligheid di e dicho hogeschool y a wordo desaroya y brinda den colaboracion estrecho cu Arubahuis, Curaçaohuis, Sint Maarten House, Ministerie van Binnenlandse Zaken en Koninkrijksrelaties (BZK) y Ministerie van Onderwijs, Cultuur en Wetenschap (OCW) di Hulanda.
E clausura di e minor tabata un atardi hopi interesante unda e studiantenan cu a participa na e minor a presenta nan producto final den diferente grupo na e invitadonan. E presentacion a consisti di un analisis y recomendacion riba e topico escogi pa cada partner. E studiantenan tabata tin dos luna di tempo pa profundisa nan mes den e topico di cada partner y na final presenta nan conclusion y recomendacionnan na cada pais. Den e caso di Aruba e studiantenan a elabora riba e topico di imigracion y asilo den relacion cu e situacion na Venezuela. E tarea pa e studiantenan a wordo formula door di Arubahuis conhuntamente cu DIMAS y Ministerio di Husticia, Seguridad y Integracion di Aruba. Pa loke ta Curaçao e studiantenan a elabora riba e topico di transicion pa energia sostenibel mientras cu e grupo di Sint Maarten a presenta e topico di colaboracion riba e area di educacion.
E studiantenan cu a ricibi e tarea for di Ministeriornan BZK y OCW a desaroya un concepto den forma di un wega riba e pregunta con hobenannan na Hulanda por haya mas conocemento di e demas partinan di Reino. Na final di e presentacion di e grupo di Aruba Minister Besaril a felicita y gradici e studiantenan pa nan trabou y a indica di ta sumamente interesa pa lesa e raportage final cu e studiantenan a produci. Minister Besaril y Arubahuis ta felicita De Haagse Hogeschool cu e iniciativa aki y ta contento di por forma parti di e minor Koninkrijkszaken di De Haagse Hogeschool.
