Na Oosterpark Amsterdam a tuma lugar riba 1 di juli e conmemoracion nacional di e Abolicion di Esclavitud dor di Hulanda na 1863 den e colonianan Surnam y Antianan Hulandes; e aña aki 155 aña pasa. Minister Plenipotenciario Guillfred Besaril a pone un krans den nomber di Gobierno y pueblo di Aruba.
Tabata tin discursonan di minister di Asuntonan di Interior y Relacionnan den Reino Kaisa Ollongren, burgemeester suplente di Amsterdam Jozias van Aartsen y Linda Nooitmeer, presidente di NiNsee cu ta e instituto cu ta organisa e conmemoracion.
Presentacion e aña aki tabata den man di e cantante Curasoleño Izaline Calister. E intermezzo musical a keda brinda pa e cantante di origen Arubano Edsilia Rombley.
Despues di e discursonan tabata tin 1 minuut di silencio sigui pa e parti di ponemento di krans na e “Slavernijmonument”. Banda di Minister Besaril, entre otro vice-presidente di Eerste Kamer jonkheer Joris Backer y presidente di Tweede Kamer Khadija Arib, Minister Ollongren, Minister Plenipotenciario suplente di Curaçao Eunice Eisden, representante di embahada di Surnam Ebu Jones y Consul General di Surnam Roy Lieuw A Sie tambe a pone un krans.
E conmemoracion aki a inicia na 2002 cu desvelo di e “Slavernijmonument” cu ta un obra di e escultor Erwin de Vries.