Den un esfuerso colaborativo entre e scol basico St. Paulus y e Ministerio di Sector Primario, un hardin di alimentacion nobo lo ta planta diasabra awor 20 di april 2024, di 7:00 am te cu 1:00 pm. E iniciativa aki ta parti di un proyecto mas amplio di agroforesteria na e scolnan basico, cu e meta pa inculca e importancia di autosuficiencia y plantamento bou di e siguiente generacion.
Durante e evento, e maestro-, studiante-, y boluntarionan lo bini hunto pa planta un variedad di fruta, berdura, y simia, simbolisando e desaroyo di un modelo educativo enfocando ariba siguridad di alimentacion y conservacion ambiental.
“E proyecto di agroforesteria na St. Paulus School no ta solamente tocante agricultura; e ta un klas interactivo. Nos muchanan ta siñando e lesnan valioso tocante siguridad di alimentacion, sostenibilidad, y e importancia di cuida nos planeta”, segun Minister Ursell Arends.
E dia di plantamento ta diasabra 20 di april, apenas algun dia prome cu Dia di Mama Tera, un momento dedica globalmente na proteccion ambiental. Door di aporta na e plantamento di St. Paulus School, comunidad por celebra e dia aki cu un accion di bon boluntad. E envolvimento comunitario lo yuda planta simia cu lo crece den un futuro sostenibel pa Aruba.
Minister Arends ta extende un invitacion pa uni forsa diasabra 20 di april 2024 pa 7:00 am te cu 1:00 pm na St. Paulus School na Jim Blue Jacketstraat 2, San Nicolas. E proyecto aki ta representa mas cu solamente un actividad agricola; e ta un compromiso cu nos planeta y futuro generacion.
