Minister Andin Bikker a propone Conseho di Minister pa amplia y modernisa e tareanan di Bureau City Inspector (BCI), entre otro pa yuda cu supervision di e Ordenansa pa cu cuido di mascotanan (‘Hondenverordening’). Den e cuadro ey Minister Bikker a propone pa nombra Roy Lacle como director interino a base di e maneho di Gabinete Wever-Croes pa reduci e asina yama ‘overtolligheidspool’ y mirando cu e director actual a yega su edad di pensioen desde november 2020 y a haya un prolongacion temporal pa e departamento no keda sin hefe.
Roy Lacle tin su educacion y experiencia amplio, entre otro como hulpofficier van Justitie y a percura cabalmente pa siguridad di Bestuurskantoor. Conforme e Ordenansa di Veiligheidsdienst Aruba, tur funcionario cu bay asumi un posicion di lidera un departamento tin pa pasa un veiligheidsonderzoek y esey lo tuma luga tambe manera semper.
Lo bay fortifica y modernisa e tareanan di BCI y lo bay haya mas material di trabou conforme e maneho di Ministerio di Husticia y Gabinete Wever-Croes pa cu entre otro ordediensten.
“Pues e noticia cu Roy Lacle lo a wordo nombra director di BCI dor di partido MEP y comosifurera cu lo ta trata di un nombracion politico no ta cuadra cu e realidad. El a wordo nombra director interino di BCI a base di proposicion di Minister Bikker y cu tareanan specifico pa bay fortifica y amplia BCI”, asina Andin Bikker a reacciona awe nochi.
Ta varios ta e ciudadanonan y turistanan cu pa varios aña a bin ta pidi atencion pa e problematica di mascotanan cu ta cana los den bario y areanan turistico, cual ta un mahos bista y ta duna ratings negativo riba platoformanan social cu turistanan ta frecuenta. Desde 2012 e Hondenverordening a bin na vigor pero e realidad ta cu e no tabata haya suficiente atencion, te ora cu Gabinete Wever-Croes na su entrada den gobierno a cuminsa cu un maneho integral, den cuadro di cual entre otro a habri un shelter nobo na Wayaca. Tin varios proyecto na caminda pa un miho implementacion di e Ordenansa pa cuido di mascotanan.
