Minister Andin Bikker a yama un conferencia di prensa awe mainta den cual el a admiti di ta consciente di e impacto cu scapamento di presonan for di KIA tin riba comunidad.
Pero, e kier pa tur hende sa cu el a hereda un prizon hopi deteriora, e mester mas personal y mas ekipo pa por traha cune. Pero pa falta di recursonan financiero, e no ta logrando. Awe merdia ainda e ta bay Parlamento pa pidi nan sosten tambe pa aloca mas fondo y recurso pa KIA, sino lo no por garantisa cu mas preso lo no huy.
E mandatario, cu entretanto tin casi 2 aña na poder, a sigura cu el a yega di pidi sosten mas biaha caba den pasado pero sin a logra. Awor tin un rapport cu e ta bay Conseho di Minister cune pa regla posicion huridico di e trahadonan, di nan salario, pa haya extra personal, pa haya ekiponan necesario y pa sigui riba e plannan pa traha un prizon nobo na Barcadera. Riba dje, e Minister kier pa haya mas placa pa drecha e facilidad existente.
Na e banda legal, Minister Bikker kier cambia ley pa hisa castigo pa esunnan cu yuda un preso huy y tambe pa persigui presonan cu huy. Esaki pasobra awor aki, no tin castigo adicional ora un preso huy for di prizon.
E mandatario ta spera cu Polis por logra detene e dos rumannan fugitivo mas pronto posibel.
