Awe nochi a tuma luga e sorteo di Mini Mega di Lotto di Aruba. E premio tabata un jackpot di 1.350.000 florin. Tur cumprado tabatin e chens di gana 900.000 florin cu Mini Mega y cu solamente dos florin mas, por a gana 1.350.00 cu e Mini Mega Plus.
E numbernan cu a sali ta 03-07-18-21 y e Megaball cu ta 05. No tabatin ningun ganado. Lotto pa Deporte a informa mesora cu e siguiente sorteo lo ta diabierna 26 di november y e premio lo ta 1.500.000 florin.
Esaki ta e di dos biaha cu Mini Mega ta surpasa un miyon florin e aña aki. E prome biaha tabata na januari ora cu e premio a yega 1.100.000 florin. Mester menciona cu luna pasa, despues di seis aña, e premio grandi di Lotto 5 a alcansa e bunita suma di dos miyon florin. Un solo cumprado cu a gana e bunita premio aki. El a cumpra e ticket ganado na Manton Lottery na Sabana Basora.
E prome y ultimo biaha cu e wega di Lotto 5 a alcansa un premio di 2 miyon florin tabata seis aña pasa, esta na aña 2015. E record di Fundacion Lotto pa Deporte tabata un sorteo di Mini Mega Plus di algun aña pasa cu a yega di alcansa 3.7 miyon florin!
Lotto, e loteria di Aruba ta existi desde 1982 y tin diferente wega; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e weganan di Raspa y Gana. E fundacion a sa di crece den benta di e productonan durante e ultimo añanan te alcansa un record na 2017 di 50 miyon florin! Cumprando Lotto bo ta contribui na deporte riba nos isla. E meta ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
