Manera ya ta conoci, awe Aruba a celebra 35 aña di nos Status Aparte. A tene un celebracion chikito y ameno den Ballroom di Marriott Aruba den cual a toca varios topico y tabatin algun panelista como invitado. A refleha entre otro riba tur e esfuersonan cu a conduci na cu awe nos por celebra e logro di nos autonomia como tambe kico ta e vision pa Aruba. Un di e panelistanan tabata Aldrich Croes, esta un specialista di media y comunicacion, kende a comparti locual ta su bista como persona den relacion publico y tambe den media a mira e desaroyo di nos Status Aparte pa loke ta e aspecto politico.
Croes a conta cu segun su punto di bista el a mira diferente partido nobo lanta y diferente gobernacion durante periodo dificil, entre otro e coalicion lidera pa Henny Eman, cu a enfrenta diferente reto grandi. Tambe a menciona con ex-prome minister Nelson Oduber cu su gobierno a atende cu gobernacion y con nan a traha duro pa nos tur supera dificultad. El a comparti tambe cu e Status Aparte di Aruba a nace cu dificultad, entre otro un refineria cu a dal cera debi na un flexi coker cu no a yega y Aruba a bay atras den entrada y mester a introduci medida.
Den tur esaki tambe a biba e nacemento di un pais hunto cu e comunidad, purbando asina di hunga un rol trahando cu diferente gobierno y dunando un contribucion extra na progreso di Aruba. Tin hopi cos cu falta pa haci, segun Croes a splica. Sigur un otro punto crucial cu el a menciona ta cu Hulanda ta yudando Aruba para bek riba pia, esta un privilegio cu hopi otro isla no a haya. Ta importante pa traha cu Hulanda pa yega e metanan den e landspakket pa asina Aruba por bira resiliente y despues keda para riba su mes tambe y ta spera cu tin sosten di tur sector den esaki.
