Ayera a observa Dia Internacional di Aviacion Civil

240

Ayera dia 7 di december tabata Dia Internacional di Aviacion Civil. Minister di Transporte, Comunicacion y Sector Primario, Chris Romero, a extende su palabranan di felicitacion na tur e profesionalnan trahando den e industria importante di aviacion. E bon trabou di e profesionalnan aki ta importante, cargando e sector di Turismo di Aruba, cual nos economia ta depende asina hopi di dje. 

“Nos ta reconoce e rol importante di Directie Luchtvaart den e mundo di aviacion, hunto cu stakeholders principal manera AAA NV, ANSA NV, Departamento Meterologico di Aruba y tur aerolinea, compania di ground handling, compania di mantenimiento y tur demas stakeholdersnan”, tabata palabranan di Minister Romero kenda a expresa asina su gratitud na tur esunnan cu ta haci posibel pa e trabou den aviacion keda haci optimalmente. 

Tambe Minister Romero a duna di conoce cu “e aña aki e Organisacion Internacional di Aviacion Civil (ICAO) ta celebra su di 75 aña di existencia y kier pone enfasis riba, y tambe aumenta, e cantidad di hende muhe trahando den mundo di aviacion. Den cuadro di esey, un pabien special ta bay na tur e profesionalnan femenino den e mundo di aviacion, pa cual nos tin hopi aprecio pa e dedicacion y e trabou profesional cu ta desplega”. 

Minister Romero a haci un apelacion pa inspira tur mucha na scol (y principalmente mucha muhe) pa considera un carera den e mundo di aviacion, cu antes tabata tipico un industria pa hende homber y awor no mas. Ta proyecta un crecemento di e sector di aviacion y ta bay tin necesidad di profesionalnan bon prepara.