“Ora baha salario di e funcionarionan di WEB, ELMAR y SETAR por baha e tarifa di companianan di utilidad. Esey tabata e mensahe di Evelyn Wever-Croes diadomingo anochi den un discurso nacional pa bende e reduccion di salario di entre otro e empleadonan di e companianan estatal. Ni 24 ora despues cu a pasa e ley di normering topinkomens di EWC tarifa di awa a wordo aumenta cu mas di 40% pa esunnan di menos recurso! E berdad ta alcansando tur e mentiranan di Evelyn Wever-Croes”, esaki ta e prome reaccion di e lider di oposicion, mr. Mike Eman riba e aumento absurdo di awa cu lo bay na vigor prome di juli!
Otro mentira di Evelyn Wever-Croes cu tambe a keda desenmascara ta locual ta spera esunnan cu ta traha na e compania- y institutonan aki. Eman ta bisa cu Evelyn Wever-Croes ta keda riba e mentira cu e normering topinkomens lo no tin efecto pa e trahadonan en general. Pero sindicatonan ya ta tendiendo for di gerencia di companianan cu CAO-nan planea cu aumento salarial lo no por keda realisa mas ! Hasta WEB a anuncia cu ya caba a vries salario di empleadonan. Esaki ta e comienso, pasobra no a hedge pa sigura contra di aumento di Fuel-Oil. “Nos ta teme pa e trahadonan cu vriesmento aki cu e ley di LNT lo ta permanente awor”, e lider di AVP, Mike Eman a expresa.
“Nos a cita den Parlamento for di documentonan di e ley con Evelyn Wever-Croes su gobierno mes a contesta cu ta intencion di gobierno pa e efecto di LNT trickle-down den henter e structura di salario di e companianan y institutonan publico y semi publico. Pero cu un cara di palo Evelyn Wever-Croes a nenga. Ata aki un bes mas locual nan mes a contesta. Mike Eman ta cita locual Gabinete Wever-Croes mes ta bisa: “De normering van de topsalaris binnen de verschillende entiteiten zal mijn inziens uiteindelijk WEL moeten leiden tot een herziening van de totale loonstructuren in die ondernemingen”. Evelyn Wever-Croes ta admiti, den papelnan cu pueblo no ta mira, cu si e ta su intencion pa e ley aki afecta henter e structura di salario di tur cu ta cay bao di dje y den Parlamento ta keda para riba un mentira. E berdad aki den e documentonan tambe a alcansa su mentira.
Tur e mentiranan di Evelyn Wever-Croes ta wordo alcansa pa e berdad, pero lamentablemente hopi bes ya e daño ta haci. Pero nos lo keda divulga, denuncia y bringa inhusticia aki te ora Aruba wordo libra di e mentiranan y abuso aki di Gabinete Wever-Croes y nos lo keda lucha te ora nos por libera Aruba for di e sufrimento aki y pone nos Pais riba un rumbo di principionan di Bon Comun cu lo mester trece bek felicidad den tur hogar na Aruba, e lider di oposicion Mike Eman a finalisa bisando.
