Tur servicio digital ta disponibel: DIMP ta habri diabierna atrobe

Departamento di Impuesto ta informa cu e ta cla pa brinda servicio bek na tur contribuyente riba diabierna, dia 1 di juli 2022. A haci tur trabao preparativo durante e dia di 30 di juni. Staf y personal di Departamento di Impuesto a logra controla tur ekipo pa cualkier daño di awasero tanto na e oficina principal na Camacuri como tambe na tur MFA y na Postkantoor San Nicolas.

E tecniconan y personal di Departamento di Impuesto a logra start tur e sistemanan digital bek y a haci e testnan necesario cu exito. Pues tur oficina, esta e oficina principal na Camacuri, MFA Noord, MFA Paradera, MFA Santa Cruz, MFA Savaneta y Oficina di Post na San Nicolas lo ta operacional segun e orario di custumber.

Alabes e departamento ta informa cu tur servicio digital, e portal “BO impuesto” y e formularionan digital ta disponibel tambe na nos contribuyentenan. E departamento ta contento cu nos isla no a wordo azota pa e tormenta manera tawata premira. Pa e departamento tawata sumamente necesario pa baha tur sistema digital di un manera structura y controla, proteha e personal como tambe tur aparato manera computer-, server- y printernan, como medida di precaucion y proteccion di informacion di nos contribuyentenan.

Departamento di Impuesto ta gradici su staf y personal pa e cooperacion y e trabaonan desplega durante e ultimo 2 dianan y tambe su contribuyentenan pa nan comprencion den e situacion extraordinario aki.