Desde cu gobierno di coalicion MEP-POR-RED a forma gobierno algo mas cu seis luns pasa, ta confirmando e gran diferencia cu tin entre un gobierno di AVP cu na tur momento a traha pa atende interes general di henter pueblo y e gobierno actual cu ta mustrando tur dia cu interes di amigo- y famianan, sponsor y sostenedonan di partido, ta bin na prome luga.
Ex Minister di Energia den gabinete Mike Eman I y II, sr Mike de Meza a mustra cu durante e ultimo ocho añanan di gobierno di AVP, a haci tur ehercicio, a percura pa den tur forma posibel, percura pa alivia e peso di costo di awa y coriente pa pueblo.
“Otro punto preocupante ta henter e desaroyo di ‘hedging’ cu tanto partido MEP a uza como arma politico den campaña, pero awor cu nan ta den gobierno, por mira un desaroyo caminda nos por bisa cu den e proximo lunanan, pueblo lo por bay wordo confronta c’un aumento dramatico di prijs di awa y coriente, tur esaki pa e falta di vision di e gobierno aki, e falta di capacidad y sigur e falta di conocemento di e materia.
Ta gobernantenan cu tabata grita tur sorto di cos relaciona cu hedging y hasta ainda por scucha algun parlamentario di MEP ta grita hedging no tabata bon pero aki ta bon pa mi mustra cu hedging a cuminsa bou di gobierno di MEP y semper hedging a wordo ehecuta dor di WEB.
Durante gobernacion di AVP, tabata WEB cu tabata ehecuta e proceso di hedging pero cierto momento WEB a bay over na hedge pa 90-95 porciento pa un periodo di dos aña y mi tin cu bisa cu mi persona siendo Minister di Energia, no tabata di acuerdo cu e decision ey.
Despues cu WEB a ehecuta e decision aki mi a wordo poni na altura di e decision ey y mesora nos gobierno a tuma accion, nos a bay Parlamento pa asina nos tuma accion pa suavisa e situacion dor di baha e prijs di awa y coriente mas cu por y habrie den su termina tambe cu a permiti baha e prijs di awa y coriente.
E gobierno aki a papia di rebaha prijs di awa y coriente cu 50% loke hamas nan lo por logra esaki den e maneho cu nan tin caminda ni 10% nan lo por logra na reduci esaki.
Durante di nos periodo di gobernacion na 2012, nos a baha e prijs di awa cu 33% y nos a baha e prijs di electricidad cu 16% y na december di 2015 nos a bolbe baha e prijs di awa cu 10% y na december 2016 nos a baha e prijs di electricidad cu algo mas cu 10%.
E prijs di awa for di 2012 no a mira un cambio te cu dia di awe y esey nos a logra dor di elimina e brandstofclausule cu a bin permiti pa stabilisa nos economia pero awe nos por mira nos gobernantenan, nos Prome Minister cu tambe ta Minister di Energia, cu no tin nocion, no conoce e materia totalmente y ora cu el a drenta gobierno el a bisa cu e ta bay stop e hedging, despues a bisa cu nan tin cu dicidi si ta hedge of no, despues bolbe kita hedging y awor cu prijs di crudo a subi, ta core manda nan bay hedge atrobe pero ya ta laat caba pa evita cu esaki lo bay influencia e prijs di awa y coriente den proximo lunann,” Parlamentario Mike de Meza a declara.
