Durante un curso di por lo menos seis siman largo, via e sistema di Zoom, a haya les special riba dos curso. E prome tabata habilidad pa skirbi na papiamento. Den e di dos buelta a duna curso riba habilidad pa skirbi (avansa) y presenta na papiamento. Un grupo di reportero y redactornan na 24ora.com tambe a participa activamente na e curso y a logra nan certificado cu exito.
Durante e dos cursonan aki, a haya hopi informacion riba nos idioma, e forma corecto di skirbie y con pa presenta den e idioma. Claro, como cu tabatin mas participante di otro medionan di comunicacion, a probecha di haci preguntanan specifico na e facilitado, e maestro Gregory Goedgedrag. El a hinca e cursonan di tal forma den otro, cu e ta yuda e miembronan di prensa con aplica e curso aki den nan trabou di tur dia, sea pa skirbi e idioma of pa presenta e idioma na radio, television of riba plataformanan digital.
Siman pasa a organisa un ceremonia cortico pa otorga certificadonan, den forma Drive Thru dilanti Universidad di Aruba. Por a pasa cu auto, baha tuma certificado y continua. Esaki pa evita aglomeracion y pa mantene distancia social entre tur participante.
Universidad di Aruba a pidi pa comentario di e participantenan, pa cual a sigura cu tin hopi interes pa sigui mas curso y sigui profundisa specialmente den nos idioma. Siendo un idioma dinamico cu ta pasa dor di desaroyo constantemente, ta importante pa sigui educa pa por mehora. Den e proceso a pidi e maestronan na Universidad di Aruba pa tene cuenta cu tin un generacion nobo drentando prensa, cu no necesariamente tin e mesun conocemento di nos idioma, pa cual e cursonan aki ta bin na bon momento.
Pa Headlines Group, cas editorial di 24ora.com, a participa Mark-Benson Denz, Patrick Paskel, Theodoor de Jongh di nos departamento di operacion, Everlis Tromp di nos departamento di rednan social y redaccion, Brian Koolman di redaccion y Nathalie Winterdaal di redaccion. Na momento di tuma nos certificado, tambe a yega nos colega Cornel Djaoen di Telearuba.
Tocante drs. Gregory Goedgedrag
Gregory Goedgedrag, naci dia 29 di mei 1964, a studia 4 aña na MAVO, sigui pa 2 aña na HAVO, 4 aña pa bira docente y despues 4 aña mas pa specialisa pa por duna les di papiamento. El a logra su “bachelor” den papiamento na aña 2006 na IPA mes y a logra su “master” na aña 2013 via Maastricht University. Desde aña 2006 e ta traha na Instituto Pedagogico Arubano, pa educa futuro docentenan, specialmente pa e materia di idioma papiamento.
