Diahuebs ultimo a tuma luga un reunion yama pa partido Accion 21, unda cu a invita e partidonan politico no-tradicional p’asina intercambia di idea na Surfside Marina.
Lider di partido, Miguel Mansur, a comenta cu e reunion a bay hopi bon y fructifero. Meta di e reunion tabata pa habri un dialogo entre e partidonan no-tradicional. A invita e 10 partidonan no-tradicional, cu a participa n’e eleccion 2021. Cinco di nan a acepta e invitacion, algun di nan no por a bin e anochi, pero si a expresa nan interes pa participa den futuro.
Mansur a comenta cu esaki tabata un bon comienso y tur partido a bay di acuerdo pa sigui reuni. E idea tras di e iniciativa aki ta pa coopera cu otro, mira con realmente por trece un cambio den e manera di haci politica na Aruba. Ta un cambio tambe den e atmosfera politico den e pais. Mansur a splica cu den e ultimo eleccion 19.500 hende a vota pa un alternativa, cual no ta un di e dos partidonan bieu. Tur sondeo y indicacion a mustra cu e proximo eleccion esey lo t’e grupo mas grandi di votado. E iniciativa ta pa miho representa e votonan ey den parlamento y a traves di parlamento, trece e cambio cu e diferente visionnan cu tin pa nan bista pa futuro.
