Partido UPP di Booshi Wever a tuma nota con Gobierno a purba desvia atencion di loke realmente ta tumando luga na Ser’i Teishi. A organisa un show pa pinta cu e sitio ta bon maneha, siendo cu e ta un simpel dump, pero unda sponsor di un Minister ta birando miyonario cu e practica aki. E ex Minister di Medio Ambiente ta babuca con gremionan tur ta man crusa siendo cu tin actonan dudoso tumando luga na Serlimar!
Pa por papia di un “Sanitary Landfill”, pa cuminsa bo no ta uza terenonan cu ta un “prime location” y cu ta un di e sitionan mas bunita di naturalesa. Pakico no a haci uzo di e tantisimo buraconan coba riba nos isla? Un di e rekisitonan primordial ta cu abou riba e vloer mester bin un “primary liner ” di un bon calidad y instala conforme protocolnan internacional pa expertonan cu NO tin na Aruba. Esaki ta pa evita cu cualkier likido dañino por pasa bay den nos grondwater y contamin’e cu un “leachate”, cu ta e likido cu ta sali for di e desperdicio di cas cu ta dañino pa nos “grondwater”.
Despues por pone “secondary liners” pa evita cu p.e. awa di yobida por pasa y bay den nos subsuelo y daña nos grondwater. Si no haci esaki NO por papia di un “sanitary landfill “. Esaki lo ta un nada mas y nada menos cu un DUMP, loke ta e caso actualmente na Ser’i Teishi. Pasobra cu aki no ta cumpli cu e rekisito basico y primordial, ta pone nos haci e siguiente preguntanan y/o observacionnan:
* En bes di pone “primary liners” abou y despues pone e “bales”, ta pone e “bales” prome despues e “liners” ariba. Si tin “leachate” esaki ta bay abou y no ta bin ariba. (Buchi robes). Mester tuma nota cu ta visibel cu tin varios di e “bales” ta kibra y cu e contenido no ta full seco. Si tin “leachate” esaki ta bay direct den nos subsuelo pasobra no tin un “primary liner” y nos tur sa kico esaki kiermeen.
* Ta pone “bales” riba e vloer (sin “primary liners”) pa despues tapa esaki cu un “secondary liner”. Ta pone calichi y despues ta bay pone e tubonan pa saca eventual gasnan toxico!! (atrobe Buchi robes). Poniendo e tubonan despues, lo bora e “bales” cu na su turno lo causa mas “leachate”!
* A ser declara cu ya a pone 6900 m2 di “liners”, cu no ta barata. “Liners” di bon calidad no ta baha bou di 150 florin pa m2 incluso instalacion dor di expertonan. Saliendo cu no a cumpra e “top quality”, mi ta pone e prijs na 50 florin, y nos ta yega caba na un total di 345.000 florin. Tabata tin un destaho publico pa esaki??? A ser menciona cu e DUMP aki lo bay cubri 150.000 m2. Na “liners” so esaki ta nifica un total di 7.5 miyon (7.500.000,=) florin. Te asina leu cu UPP sa, no tabatin NINGUN tipo di destaho. Unda e gremio sindical y comercial a keda? Nan tin miembronan den e Raad van Toezicht di Serlimar toch?
*Den Serlimar no ta aplica e code di Corporate Governance manera ley ta prescribi? Of e director pornostar handpicked ta haci loke e Minister ta dicta?
*DNM a bay di acuerdo cu e sistema aki? Ta un simpel DUMP Ser’i Teishi lo bira , nada di “sanitary landfill” conforme protocolnan estableci!
*Na principio a gaña e pueblo cu Ser’i Teishi lo ta un facilidad TEMPORAL pa warda e “bales” aki, pero manera nos a tuma nota, cu e “prime location” aki lo bira un DUMP y no un “sanitary landfill” manera cu kier pretende awor. Obviamente ta actua ad hoc sin ningun clase di planificacion, pa asina ey keda manipula y sigui cu e tipo di corupcionnan aki.
* TNO ta bay di acuerdo cu esaki? Unda e tantisimo medio-ambientalistanan ta kedando? Tur a haya “hush-money”?
Kico mas mester pasa pa e Minister aki wordo para? No tin un “rattenval” pa garé? Ta bisto cu den e gobierno POREDmep ta e Minister ey ta dicidi y ta faborece su sponsornan y esnan cu ta “front” p’e y ta parce cu esaki no ta sosode solamente den su ministerio pero den otro ministerio tambe.
