E ta e cara di Diario, e ta un di e prome empleadonan cu Bo ta topa asina Bo drenta matutino Diario. Semper cu un sonrisa, semper contento, aunke cu su trabou di tur dia ta traha anuncionan di morto. Cu 38 aña di servicio na Diario y cu 68 aña di bida, un rato pasa nos colega Edgar “Robby” Burleson a bay sosega den Reino di Señor. El a bay laga atras su casa Gina y su yiu di criansa Minguelito. Robby a sufri un reto serio cu su salud mas trempan na su cas, cu a hink’e den un bataya formal, pero cu na final el a perde awe nochi.
Robby Burleson riba su mes tin mas cu 40 aña caba trahando den prensa. El a cuminsa cu La Prensa y despues Harry Croes a puntr’e si e kier traha pa un corant di Aruba mes, pero el a keda pensa dos pa tres biaha prome cu el a acepta, pasobra e no tabata sigur con e corant lo bay. Luna pasa el a cumpli 38 aña trahando cu Diario, como un di e pioneronan cu a yuda funda Diario, e prome corant netamente Arubiano.
Robby Burleson na Diario tabata encarga cu noticianan deportivo, noticianan di suceso, a yega di entrevista hopi personahe internacional di deporte y tambe tabata traha articulonan di Carnaval uzando e pseudonimo “Skribidi”. E ta un referee di Basketball tambe. E tabata hopi agil den labamento di film, imprimi potret y tabata haci esaki hopi rapido.
Ainda ta corda su prome experiencia na Diario, ora a mand’e saca potret di un accidente te na San Nicolas. El a conta cu ora el a yega banda di e rotonde di Talk of the Town, el a haya su mes den un accidente pasobra el a pega soño, debi na tur e dianan a keda lanta ta traha. El a dal riba acera y e mester a yama Harry Croes mes pa bis’e cu e no por yega San Nicolas, pasobra el a haya su mes den accidente y cu mester a bin busca su camara pa bay saca e accidente na San Nicolas.
Robby Burleson a traha cu Djispi, cu Django, Toko y Leo cu tambe a bin acerca entre e grupo di reporteronan di e tempo aya. Robby Burleson a traha mayoria di su añanan como Redactor Deportivo na Diario y ta un bon conocedo di deporte.
Staf y personal di Headlines Group, cas editorial di e website mas lesa na Aruba, 24ora.com, ta expresa palabranan di nos mas profundo condolencia na su famia, na su coleganan y na tur su conocinan. Cu nos amigo Robby sosega na paz.
