Mientras cu e alerta a drenta na vigor awe merdia pa biento y lama bruto, Servicio Meteorologico di Aruba (Meteo) ta pronostica awasero den e siguiente oranan di anochi, marduga y mañan mainta.
Tempo:
Shelo awe nochi lo ta parcialmente nubla cu poco awasero den marduga. Diaranson parcialmente te hopi nubla cu posibilidad di mas awasero.
Biento:
Biento lo ta modera te fuerte for di direccion oost-noordoost te oost-zuidoost cu forsa 4 te 6 (20 te 50 km/ora, 11 te 27 nudo). Den dia duro te posiblemente hopi duro den rafaga cu forsa 7 te 8 (51 te 64 km/ora, 28 te 35 nudo).
Situacion general di tempo:
Den e proximo 24 oranan, un zona di convergencia intertropical lo por bira activo y pone cu temporalmente mas nubia lo pasa riba e isla. Esaki lo por produci algun awasero local compaña pa strena cu lamper. Awasero por causa molester na e lugarnan di custumber den caya.
Condicion di lama:
Olanan di lama lo ta for di direccion oost cu haltura di 5 te localmente 8 pia cu e olanan di mas halto na costanan oost, noordoost te noordwest di nos isla. Ta pidi usuarionan di lama y doñonan di boto chikito pa tene esaki na cuenta y pa bay cu cautela riba lama.
Tempo tropical significante:
Chris a bira un horcan y tabata situa oost- zuidoost di Cape Hatteras na North-Carolina y ta move den direccion noordoost. E bientonan di mas fuerte rond di e centro ta di 140 km/ora. E sistema aki no ta forma peliger pa nos region.
Pronostico di tempo pa proximo dianan di siman:
Parcialmente nubla cu poco awasero. Biento lo ta for di direccion oost y modera te basta fuerte; Den dia fuerte te posiblemente hopi duro den rafaga; Temperatura max / min lo ta: 33/27.
