Por mira cu e facilidad na Dakota, ta ideal pa hinca ilegalnan aden. Eynan e comision a haci un evaluacion rapido cu e comision di DOW, pa wak con por yega na algo temporal pa por restaura e facilidadnan aki, pa asina nan por hinca e indocumentadonan aden y tambe e aspecto cu KIA ta sobrepopula cu ta rekeri pa tuma pasonan rapido, pa por acapara esaki.
Un urgencia di dos banda
Loke lo bay wak, ta e parti di Warda nos Costa, cu e dimension di personanan cu a viola nos leynan di LTU. Pa ley ta personanan cu ta comete infraccionnan administrativo. No por compara nan cu un persona cu a comete un crimen.
Un facilidad di detencion, no ta mesun reenforsa manera un prizon. Awor aki e urgencia cu tin ta dos banda. Ta bay wak di biaha awor aki pa loke ta Warda nos Costa.
Diadomingo tabata tin un hende cu a huy, cual a pone cu tin un urgencia mas grandi riba e diferente dimensionnan aki.
Si un persona cu ta wordo deteni pa falta di infraccion cu e ta ilegal na Aruba cu e ta wordo expulsa, hinca den su cabes pa huy, e persona aki tin menos intension cu nos pais. Riba e dimension aki mester acapara y controla.
E minister tambe kier haya un conseho di DOW, si e facilidad eynan, cu na final di dia tabata e prome prizon di Aruba, si temporalmente lo por tin algun cupo cu no lo tin na KIA, cu si lo por tin na Huis van Bewaring. A base di consehonan esaki ta bay wordo evalua.
Awor aki cu hopi urgencia mester pa Warda nos Costa, pa esnan cu na e facilidad actual tin personanan sumamente violento. DOW a reforsa e bentananan di e luga, pero tin hendenan cu forsa bruto cu por yega kibra bentana. E facilidadnan aki ta traha mas bien pa detencion di personanan den un ambito civico y no di un persona cu ta bay keda hopi tempo eyden. Na fin di dia, cu ora cu detene un persona pa detencion, e ta keda algun dia maximo, pa despues bay su pais y no cu e ta bay keda pa un tempo largo cera, segun e mandatario.
