Durante e conferencia di prensa di AVP a puntra Richard Arends pa splica con e ta mira e intencion di baha edad di pensioen na 60 aña. Esey ta un punto cu di berdad como consehero for di 2010 caba den e dialogonan social, ta algo cu a discuti ampliamente cu expertonan. A discuti tur e posibilidadnan den diferente fase. Si wak e reformanan di pensioen cu a introduci hunto cu e partinan social, a cuminsa for di 2011, cu ahustenan di prima, a cuminsa cu e verzelfstandiging di homber y muhe, ora di cobra e pensioen. A amplia e premiegrondslag. Esey tabata e prome fase di pensioen. E reformanan di fondo di pensioen pa por garantisa atrobe. AVP no ta comete kiezersbedrog. Den e prome Gabinete Eman, no a bay eleccion na 2009, bisando cu lo aumenta edad di pensioen y esaki a haci tur loke tabata posibel y necesario pa por salvaguardia e fondonan di pensioen e tempo ey, cu ya caba no tabata tin reserva, pa por garantisa e pensioen di nos pensionadonan y tambe e pensioen di e pensionadonan existente y tambe e pensionadonan den futuro. Na 2013, na momento cu a bay eleccion pa di dos biaha, a bisa si den programa di partido cu lo aumenta edad di pensioen, pasobra esey tabata e ultimo reforma cu ta necesario pa por garantisa e pensioen di nos pensionadonan pa e proximo 30 añanan. E diferente reformanan, e diferente cambionan cu a introduci, tabata loke tabata posibel y sumamente necesario, sin causa ningun shock social y laboral. A straña Arends, durante contienda electoral, cu partidonan politico cu por a baha edad di pensioen pa 62 aña.
SVb a calcula tambe e bahamento di edad di pensioen na 62 aña, ta crea un deficit caba di miyones. A wordo bisa cu esey ta wordo paga door di reduci e cantidad di ministernan, ta wordo paga door di reduci cantidad di conseheronan. Ban pone cu esey ta berdad. Cada aña e deficit ta crece reduciendo esaki na 62 aña. Richard Arends sa bon e proceso cu a wordo cana pa e pensionado di presente y esun pa futuro. Y Arends ta ansioso pa mira kico ta bay ta e plan con e partidonan nobo cu a drenta den Gobernacion, con nan ta bay ehecuta nan programa di Gobernacion, cu ta supone cu ta consisti entre otro di reduccion di edad di pensioen y con nan ta bay financia esaki.
