Parlamentario drs. Mervin Wyatt-Rasa a tuma nota di diferente combersacion cu formado Evelyn Wever-Croes tabatin cu departamento, entidad, organisacio y profesional riba diferente tereno. Despues di e combersacionnan cada ken a sali bisa den prensa ki tema of asunto a keda discuti. Wyatt-Ras ta spera cu e siguiente gobierno ehecuta locual e diferente instancia y organisacion a trece padilanti. E ta referi specialmente na e area social. Segun Wyatt-Ras, gobierno no a logra e resultadonan desea pa loke ta trata sector social. Por menciona e ley di castigo minimo di 5 regel cu Wever-Croes a priminti di pasa den 6 minuut den parlamento y e plan di crisis social cu no tabatin e resultado priminti.
Wyatt-Ras ta trece padilanti cu por constata cu durante ultimo tempo, e casonan di hoben evolvi den acto di violencia, maltrato y hasta asesinato ta aumentando. Aki ta trata di hoben di entre 15-19 aña. Ademas tin e preocupacion rond di aumento drastico di e casonan di abuso sexual di mucha. Wyatt-Ras ta menciona algun ehempel, dia 26 april 2019 amigo di cas di 36 aña di edad a viola mucha di 12 aña na cas na Hooiberg. Dia 29 april 2019 ta notifica cu welo a abusa di mesun nieta. Dia 4 di juni 2019 a publica cu homber naci na Jamaica a viola mucha muhe di 24 aña y cu tata di e victima a bay dia 30 di mei na Flamboyantstraat pa regla cuenta y a kap un di e abusadornan cu machete te cu el a fayece na hospital. Un otro caso ta na september 2019 cu’n homber di 52 aña cu ta traha na DOW a keda deteni. Cu pickup di trabou e tabata hiba e muchanan di 14,11,8 aña y abusa di nan.
E muchanan tabata nieta y subrina di casa di e abusado. Ademas por menciona e caso di abuso di e menor di 12 aña door di un chauffeur di bus di cual por a tuma nota cu tata di e victima a dicidi di pone fin na su bida. Vocero di cuerpo policial na mei 2019 a trece padilanti cu tin cantidad creciente di caso di abuso di menor y cu entre 1 di januari te cu 30 di april 2019 tabatin 31 denuncia. Ta keda un reto pa e casonan aki cana nan caminda pa Ministerio Publico paso di e casonan aki tin cu convence OM pa por bay over na detencion. Hospital tambe den e periodo desde 2018 a trece padilanti cu tin un caso pa siman. Despues a bira 2, 3 y awor hasta 7 of mas caso pa siman.
Prome cu esaki na aña 2017 momento cu gobierno di MEPORED a bin na mando, e gobierno aki a trece padilanti cu tin un crisis social. A usa un caso den cual dos mucha chikito a perde nan bida na man di nan padrastro abusador y nan mama. A lanta un fondo di crisis social di 38 miyon florin, diferente instancia y fundacionnan lo mester a haya ayudo financiero y pa medio di proyecto pa disminui y preveni abuso di menor. Sinembargo e cantidad di casonan a sigui subi. Ademas e casonan di hubentud awor ta mas severo manera di agresion y asesinato cu arma.
Djis pone placa y priminti no ta suficiente, segun Wyatt-Ras, paso tin hopi instancia ta keha cu nan no a haya e ayudo cu nan a spera y priminti for di e fondo di crisisplan. Den e ley di Codigo Civil, aproba na 2016-2017 ta trece dilanti cu tin un meldpunt na unda e muchanan abusa sexualmente por acudi. E meldpunt aki cu a bira SOSTENEMI no a wordo fortifica manera debe ser. E sistema di registracion no ta regla door di cual no tin bista riba e cantidad preciso di caso ni na unda e casonan a referi. E cooperacion entre e instancianan tampoco no a mehora manera mester ta. Ainda e clientenan ta keha cu nan ta manda nan di cashi pa muraya pa haya ayudo. Caso ta keda pega y e clientenan no ta sigui haya ayudo manera cu nan a spera di haya. Tampoco no a baha e listanan di espera na diferente instancia manera inicial tabata e meta di e fondo aki. A nombra entre 50-60 contractanten pa por alivia esaki, sinembargo e instancianan a duna di conoce den reunion cu parlamento cu nan ta desea cu nan empleadonan ta cay den nan propio presupuesto y no den presupuesto di e fondo di crisis. Varios instancia a indica alabes cu ainda nan tin dobel tarea, pasobra ora nan no por referi cierto caso, e caso ta cerca nan instancia y e tempo ta bay a costo di otro cliente. E coordinacion di e casonan den sentido di ken ta haci kico pa por dividi of parti e trabou pa e por ta mas efectivo pa e cliente, tampoco ta un reto. Pa loke ta trata e ‘signs of safety’ of e ‘safety code’, por bisa cu a introduci esaki na ultimo momento den tempo di eleccion pa cumpli cu e promesanan haci na veld social. Por nota cu diferente profesional ta hayando curso/upgrading pa cu esaki, aunke tin keho di e profesionalnan cu esaki no ta bay manera cu mester ta. Eynan tambe mester di cierto ahustacion. E ‘bottleneck’ ta keda e cooperacion entre e instancianan y e profesionalnan clave cu no ta manera cu mester ta. Si no atende cu dicho cooperacion, lo no logra cambio desea. Wyatt-Ras ta spera tambe cu e gobierno nobo dedica mas atencion na e centronan di cuido pa mucha y hoben. Pa loke ta trata e kindercentra ta di lamenta cu ainda no a implementa e ley aki despues cu gobierno di AVP, den persona di minister Michelle Hooyboer-Winklaar a presenta e ley aki y parlamento a aprob’e na aña 2017, sinembargo te ainda e no a bin na vigor. Pa loke ta Trai Merdia pa muchanan di scol basico y esun di hobennan ta spera cu e biaha aki si nan lo por haya mas atencion. Netamente den e situacion den cual hobennan ta manifestando problema cu agresividad y ta vulnerabel pa cay den situacion di abuso/maltrato ta urgente pa regla bon acogida pa e mayornan cu tin falta di un network social y/of ta traha durante oranan largo por haci esaki trankil, cu e confiansa cu nan yiunan ta bon cuida.
Un biaha mas ta di lamenta cu a inverti 38 miyon cu no tabatin e resultado desea.
