Colin Powell, ex-secretario di estado di Merca, a fayece na edad di 84 aña di edad. Riba Facebook, su famia a bisa cu el a muri debi na complicacion cu Coronavirus. E tabata completamente vacuna. “Nos a perde un casa, tata, welo y gran Mericano extraordinario y cariñoso”, su famia a bisa den e mensahe.
Discurso di ONU
Powell tabata e prome Secretario di Estado Mericano di rasa color scur. E tabata ocupa e cargo aki entre aña 2001 pa 2005 durante e prome mandato di presidente George W. Bush. Un momento cu a destaca durante su carera tabata un discurso cu el a duna na 2003 durante un reunion di Nacionnan Uni, den bispo di invasion Mericano na Irak pa elimina e regimen di Saddan Hussein.
Powell a afirma cu e presidente Iraki tabata posee arma di destruccion masivo y cu esaki tabata constitui un menasa pa mundo. Tambe cu Saddam tabatin vinculo cu e red terorista Al Qaeda. Nunca no a haya ningun arma di destruccion masivo na Irak, ni a demostra e conexion cu Al Qaeda. Riba esaki, e ex-secretario di estado a bisa despues cu su declaracionnan na U.N. tabata un mancha den su historia. Segun fuente, e lo a basa su mes riba informacion falso di CIA.
Oficial militar Mericano di rango halto
Powell, veterano di Vietnam, tin un historia largo di servicio. Bou mandato di presidente Reagan, e tabata e prome consehero di siguridad nacional AfroAmericano di historia. Durante e prome Guera di Golfo (1991), den cual a expuls’e for di ehercito Iraki na Kuwait, e tabata e soldaat cu rango mas halto dje forsanan arma Mericano. A pesar di tabata secretario di estado cu presidente Bush, Powell a distancia dje partido e ultimo añanan.
Na aña 2008, por ehempel, el a expresa su apoyo na Barack Obama den su campaña pa yega na Cas Blanco. Tambe el a distancia enfaticamente di e ex-presidente, Donald Trump.
