Diasabra merdia Partido MEP a organisa un reunion interno, un “Partijraad” na nan cede pa ey interpreta resultado di eleccion. Lider di MEP a papia di un gratitud inmenso na tur esunnan cu a deposita confiansa den e partido.
“Nos tabatin 17 mil voto y nos a crece pa 22 mil voto!! Awor mester warda e proceso di formacion di gobierno cana su caminda y warda Gobernador su prome paso”, asina mr. Evelyn Wever a duna di conoce. Mas leu el a bisa cu “E decision di Eman pa core pa su responsabilidad ta un mal hecho y a cay masha malo den seno di nan votadornan. Si un apelacion wordo haci riba nos di MEP, nos si lo no core pa nos responsabilidad. Nos compromiso tabata y ta keda pa rescata nos pais. Lo no ta un proceso facil pasobra e retonan cu nos pais ta enfrenta ta serio”.
MEP ta hopi agradecido cu e crecemento di 5 mil voto y 2 asiento y kier demostra esey mayan diadomingo bishitando tur bario na Aruba. Un bishita di gratitud pa e cambio. “Mi ta invitabo pa bo ta parti di e celebracion aki. Nos ta topa 12or di merdia na YMCA San Nicolas y finalisa den un happy hour na Cede di MEP na Santa Cruz di 5or pa 7or. Cuminsa prepara di awor pa hunto nos pasa bishita e barionan di Aruba”, asina Evelyn Wever a termina bisando.
