Arubadag lo ta tumando luga proximamente na Hulanda y manera nos a compronde ta parce cu mayoria den conseho di Minister ta planea pa bay biaha Hulanda pa atende cu Arubadag.
Nos a puntra parlamentario di fraccion di MEP Shailiny Tromp-Lee durante conferencia dialuna mainta si parlamento no ta notando un tendencia aki di un patronchi di biahe mucho pisa pa mandatarionan.
E parlamentario ta bisa cu sinceramente nan ta haya informacion ora cu ministernan ta biaha y su persona no a revisa e lista di informacion pa sa cuanto minister lo ta biahando specificamente pa Arubadag. “Lo mi tin cu bay haya sa, mi no sa cuanto minister ta bay.”
E parlamentario ta splica cu ministernan ta laga di conoce tur ora e topico pa kico nan ta biaha anto cu meta specifico. Mayoria minister ta tene un rueda di prensa tambe of na e luga unda nan ta bay of ora nan bin bek Aruba, dunando extensamente e motibo di biahe, pa ki meta nan a bay y si nan a logra esaki specificamente.
“Ami mes ta kere hopi biaha ta trece cuestionamento den biahamento, tambe den nos como parlamentario. Pero e ta forma parti di nos trabao, riba e parti di ehecucion.” E ta necesario hopi biaha pa bo bay den exterior y tene reunionnan cara a cara segun Tromp-Lee pa bishita instancia y busca relacionnan. Tin ora no solamente den Reino pero cu otro paisnan pa por ehecuta proyecto of bin cu proyectonan nobo, pero riba nivel di maneho y comercio tin biahenan realisa cu ta sumamente necesario y fructifero pa Aruba.
“Biahe hopi biaha ta necesario y ta keda na cada minister pa responsabilisa esaki. Nos ta aproba un suma pa cada minister cu nan por uza relaciona cu esaki, y di su mes tin cu ta relaciona cu metanan specificamente menciona den presupuesto cu nos a aproba. Mi ta kere cu biahe ta esencial y necesario.” Niun gobierno anterior a bisa cu no ta biaha pasobra lo ta un gañamento pa bisa cu lo por ehecuta trabao sin biahenan di trabao cual hopi biaha ta importante pa cristalisa cierto metanan.
