Siman Parlamento a trata diferente presupuesto, incluyendo esun di Parlamento mes. E presupuesto ta pa duna un bista concreto riba e maneho di Parlamento pa e aña cu ta sigui. Despues di eleccion na september 2017 ta conoci pa comunidad cu algun Parlamentario no a regresa den e Parlamento nobo (number 10), sinembargo segun ley e Parlamentarionan aki tin derecho pa ricibi locual ta wordo yama e ‘overbruggingsuitkering’, asina Fraccion di MEP a duna di conoce den un comunicado di prensa.
E ‘overbruggingsuitkering’ ta 80% di e ultimo salario pa termino di un (1) aña. Si ta di acuerdo of no cu e procedura aki, ta keda prerogativa di cada ken, sinembargo Fraccion di MEP den Parlamento ta condena e hecho cu ta mal uza informacion di e instituto aki pa crea polemica.
Inversionnan den Parlamento
Ta importante pa remarca cu Parlamento den su avance pa ta independiente lo tin di inverti den diferente aspecto pa por logra e avance aki, manera ta proponi pa hopi tempo caba. Un di nan sigur lo ta e inversion cu tin di tuma luga pa e aparatonan audiovisual nobo, esaki ta e aparatonan cu ta haci posibel pa e ciudadano y mundo henter por sigui reunionnan cu ta tuma luga den Parlamento y tambe ta yuda den proceso pa por graba y warda e informacion aki pa futuro uzo.
E independisacion di Parlamento tambe lo tin su gastonan den su intento pa informa y educa comunidad riba diferente aspecto cu ta trata e instituto sin menciona e asistencia y consehonan profesional cu e ta rekeri. E proceso ta uno di gran importancia pa e trias politica di Aruba y tin di adkiri un grupo di trahadonan cu e conocemento necesario pa por realisa e meta aki. Den esaki a aumenta e presupuesto di “voorlichting en promotie” a redobla!
Parlamento tambe ta introduci un sistema nobo di siguridad pa asisti y mehora e siguridad di personal y bishitantenan di Parlamento. Tambe ta bon pa informa cu lo renoba e parti mas patras na Parlamento cu ta den mal estado.
Parlamentarionan cu no a regresa
For di e ultimo eleccion e Parlamentarionan cu no a regresa ta Mike Eman, Melvin Tromp, Jeffrey Kelly, Lorna Varlack, Norman Roos, Clariska Velasquez, Rene Herde, Donny Rasmijn y Chris Dammers. Un gran parti di e presupuesto ta bay na e ‘overbruggingsuitkering’ di e personanan aki. Pues pa ta den tur transparencia cu pueblo e aumento di e presupuesto di Parlamento no ta pa Parlamentarionan actual, sino pa tur e gastonan, inversion y ‘overbruggingsuitkering’ di e parlamentarionan menciona.
