Mas y mas droga ta move rond di nos hotelnan. Flex Team a gara tres homber cu bastante droga den nan poder. Esaki tabata net riba e area cu tin entre Barcelo cu Hyatt. Tabata algo pasa di 9or diadomingo anochi cu e accion a tuma lugar.
E personal di Flex Team ta haciendo un tremendo trabou y tin e libertad pa move tur caminda. Na momento cu nan mira algo sospechoso, ta actua mesora. Semanalmente ta mira e resulta di e team aki riba caya. Sigur un tremendo trabou. Diadomingo nan tabata pasando den e corridor di Hyatt y Barcelo y a haya holor fuerte di marihuana. Mesora a pasa pa controla y a bin topa cu tres homber den un Kia Rio Hatchback color blauw numera A-18187.
Ora Flex Team a bay controla, a canta bingo tambe. A bin haya un cantidad di droga den nan poder y hasta un pipa pa hala droga. E cantidad di droga haya den nan poder ta un prueba cu e no ta pa solamente uso propio. A detenenan y a pidi presencia di transportwagen pa asina transportanan pa warda di Shaba. Droga tin un grupo grandi di hoben domina. Parce cu tin politico ta cana gaña cos publicamente y hinca varios di e hobennan aki den un problema. Nan ta kere cu cierto droga ta legal. Nan ta lubida riba nan futuro cu ta wordo afecta pa motibo di e droga. Pabien na Flex Team cu nan bon trabou.
