E momento ta yegando cu pueblo di Aruba ora di bay drumi, a miho pone tur porta na lock pa evita cu gobierno ta drenta y bay cu tur placa den e cas y den cartera di pueblo.
Vocero di partido AVP Melvin Tromp, ta señala cu hopi pa esunnan cu a wordo sorprendi y perhudica ora cu nan a yega pa paga nan di dos parti di number di auto, caminda nan mester a paga un multa di nada menos cu 75 florin.

“Increibel con gabinete Wever Croes cu semper a papia cu pueblo mester ta central, a dicidi di tuma otro medida, cu ta otro forma di ranca placa for di cartera di pueblo, imponiendo un multa di 75 florin pa tur hende cu a bay paga nan di dos periodo di aña.
Principalmente hopi pensionado y hendenan cu tin entradanan abou cu na inicio di aña a paga mita di e belasting riba number di auto, awor ta wordo sorprendi cu nan tin cu paga 75 florin cu ta otro dolor y abuso financiero cu nan tin cu soporta di e gobierno di coalicion na mando.
Pa colmo gobierno no a haci e situacion facil tampoco, ya cu a paga pensioen diabierna ultimo y no ta tur pensionado a haya nan pago diabierna pero otronan a haya esaki dialuna prome di juli.

Gran mayoria di nos hendenan cu ta paga nan number di auto den dos paga, ta pa motibo cu inicialmente nan no por paga esaki pa henter aña y ta paga mita prome y e otro mira awor mey mey di aña.
Pa amigo- y famianan di gobierno, un suma di 75 florin no ta mucho placa pero pa famianan di entrada minimo, pa hopi pensionado e suma aki a cay hopi pisa ya cu ora cu nan cay atras cu pago di recibo di coriente of awa, nunca nan mester paga un multa asina exagera manera a bira e caso cu belasting pa number di auto.

Na momento di paga e di dos parti di number por scucha hopi insulta a cay pa motibo cu hopi hende no a spera e abuso aki sigur no pa un suma asina abrumado y sin hustificacion, causando iritacion grandi cerca esunnan cu a wordo sorprendi cu e abuso aki.
Practicamente nos por bisa cu pueblo a haya un ‘surprise party’ sin spera un biaha mas for di gabinete Wever Croes cu ta sigui ehecuta su unico vision politico cu e tin, esta di castiga pueblo lo mas posibel, mientras cu ministernan mes di e gabinete aki, ta sigui cu nan ‘worldtour’ biahando di pais pa pais, di ciudad grandi pa otro ciudad grandi cu placa di pueblo.
E abuso cu multa pa pago di number di auto ta uno di marca mayor ya cu tradicionalmente ora cu e fecha yega, ta duna pueblo algun siman pa por ahusta nan presupuesto di cas pa asina acomoda e pago aki cu nan no a spera di ricibi y pa un asuma asina halto.
E maltrato financiero di gabinete Wever Croes ta sigui y por spera cu den lunanan nos dilanti, esaki lo sigui sin precedente ya cu e gobierno aki cu no tin vision financiero of economico, ni vision social of educacional, ta sigui kere ciegamente cu su unico forma pa goberna, ta di pone pueblo paga pa un programa di gobernacion cu ta dirigi pa acomoda famia y amigonan, sponsor y doñonan di partido, mientras cu pueblo tin cu keda desampara cu e maneho cruel aki,” sr Melvin Tromp di AVP a declara.

Comments

comments