Awe marduga Tweede Kamer na Hulanda a aproba e concepto di ley di “Areglo di Disputa pa Reino Hulandes (Koninkrijk Gechillenregeling)” di Secretario di Estado pa Asuntonan di Reino, Raymond Knops. Pa dos dia Parlamento di Hulanda, cu contribucion di miembronan di Parlamento di Aruba y Corsou a debati riba e proposision di Knops pa bin cu un Areglo di Disputa. Lamentablemente na final partidonan no a logra haya otro na e forma cu Aruba y Corsou lo a desea, pasobra keto bay Gobierno di Hulanda ta keda cu e ultimo palabra den un discusion asina!
Durante di e debate a entrega diferente amienda. Un di e amiendanan tabata di Presidente di Parlamento di Aruba, mr. Ady Thijsen, pa cambia “Afdeling advisering” di Raad van State pa “Afdeling Koninkrijksgeschillen”. A aproba e amienda aki aunke cu pa crea e departamento nobo aki lo mester pasa un cambio di ley di Raad van State (WRvS).
Minister Plenipotenciario, Guillfred Besaril, a asisti na tur dos dia di debate y a bisa despues cu “Mi no por bisa cu mi ta contento cu e ley, pa motibo cu e paisnan di Caribe Hulandes tabata kier un contenido diferente na loke a aproba awe marduga. Mi por ta satisfecho si cu e delegacionnan di e diferente paisnan, incluso Hulanda, comokiera cu tur a pone di nan parti, pa awe tin algo riba mesa. Mi tabata enfatico na un y tur cu despues di 10 aña di ta atendiendo e tema y discuti, a yega ora pa tuma un decision. Awor ta keda na Eerste Kamer pa vocifera su mes y mira kico e practica di e ley aki lo trece cune den futuro”, asina Minister Besaril a indica.
Ta bon pa enfatisa riba e hecho cu tanto Aruba como Corsou a desea un amienda cu ta bisa cu den un discusion y impasse entre e Gobiernonan di Hulanda y un partner den Caribe Hulandes, cu lo por acudi na e Corte di Raad van State. Ey nan lo evalua un ke otro y tuma un decision cu mester ta “bindend” pa ambos Gobierno. Pero Hulanda for di prome dia a bisa cu nan lo NO acepta e cambio aki pasobra nan kier y lo keda cu e ultimo palabra.
Na dado momento durante e negosacionnan a yega asina leu cu Aruba y Corsou a logra convence Parlamentarionan Hulandes pa para banda di nan den un amienda y esey a mustra positivo. Pero na momento di votacion, e delegacion di Hulanda a cambia di opinion y a pasa un otro mocion/amienda cu no ta haci mucho cambio. E liña cora ta cu e departamento nobo na Raad van State lo NO tin e ultimo palabra den un disputa, pues e islanan ta para na e mesun crusada manera prome.
