Diamars mainta trahadonan di FCCA a pone trabao abao pa un ora, mirando e actitud di gerencia. Tur esaki tin di haber cu nan no kier pa nan tin un sindicato, den e caso aki FTA y nan kier pa mantene un rechtspositieregeling.
Riba esaki nos a combersa cu mediador di gobierno, Anselmo Pontilius, kende a splica cu e partidonan ta na mesa pa basta tempo y tin un diferencia di opinion riba un punto den cual, despues cu a combersa cu gerencia via telefon, a keda di haya un carta for di nan, den cual nan ta informa nan punto di bista.
A pidi tanto dirigentenan di FTA telefonicamente y esnan di FCCA pa keda pendiente. Lo invita nan pa un reunion. Pero pa awo ta spera e carta cu drenta y cu una bes cu sa e contenido di e carta, lo invita e partidonan y/of conseha e partidonan pa sinta na mesa, mira con ta supera e discusion cu tin riba cu, tin di compronde cu no necesariamente un punto cu mayoria biaha ta pega den dje, cual ta e parti financiero.
Si tin di haci cu miembronan di gerencia of di staff si nan ta miembro si of no, ta un punto cu nan por supera. Mediador di gobierno ta spera cu e partidonan por sigui na mesa, sin mester di presencia di mediador di gobierno.
Tin cu tene cuenta cu den nos constitucion, tur hende tin e libertad di asociacion. Esta e libertad di ta miembro si of no, di cualkier organisacion. Ta asina cu na Aruba tin hopi contracto colectivo den cual ora negosha esaki, e dunado di trabao y e sindicato ta palabra por ehempel cu e contracto colectivo aki no ta aplicabel riba un cierto cantidad di funcion, cual ta funcionnan di gerencia. Pero ta un acuerdo entre partidonan. No ta asina cu un partido ta impone riba e otro. Y e tin un liña cora cu ta core cu bo tin cu tene masha bon cuenta cun’e, cu e hecho cu si bo palabra mes cu por ehempel e contracto colectivo lo no ta aplicabel pa cierto funcionnan, esey no ta kita e libertad di e trahado di ta miembro di un of otro sindicato.
Esey ta dos punto separa for di otro y ta derechonan constitucional. Aparte di e tratadonan internacional di cual Aruba ta forma parti di dje como pais den Reino, tin cu tene cuenta cu esaki. Segun Pontilius, ora cu haya e carta y scucha e partidonan, lo mira con nan lo mester por supera esaki pasobra no mester por tin discusion riba e parti aki, riba pa ken si of pa ken no e contracto colectivo ta aplicabel y tambe con leu bo ta mishi cu derecho individual di cada persona, di ta miembro si of no di un organisacion sindical.
