Diamars mainta a inicia un reunion publico caminda e invitado pa e reunion tabata Minister di Integracion y Energia, Glenbert Croes. No ta for di awo sino for di februari 2023, MAS y AVP a pidi un reunion publico p’e minister bin duna cuenta di su maneho no transparente pa cu e proceso di admission na DIMAS. E no a bay facil pa haya e minister den parlamento, a manda tres carta di rappel pa finalmente hay’e den sala pa bin duna cuenta.
Marisol Tromp, lider di fraccion di MAS ta por lo menos un di e parlamentarionan mas preocupa. E ta cuestiona e forma con a dura un aña y dos luna pa logra haya un minister den sala pa bin duna cuenta di su maneho. Mientrastanto, segun Tromp, a nota cu e minister tabatin tempo suficiente pa biaha rond mundo y cu frecuencia pero pa bin haci su trabou y bin duna cuenta den parlamento, no tabatin cuenta. E parlamentario ta di opinion cu e procedura den DIMAS y con Minister Glenbert Croes ta hibando su maneho pa cu integracion; no ta transparente y ta di cuestiona. Claro, pueblo merece un claridad tambe, ta p’e motibo ey mes a manda yam’e den parlamento.
Mirando e comportacion no integro di e minister y su falta di respet enorme pa e instituto mas halto di nos pais, no a ked’e nada otro di entrega un mocion di desconfiansa contra Minister Glenbert Croes. AVP y MAS a cera cabes y entrega e mocion.
Drs. Marisol Tromp den un declaracion a declara cu e mandatario ta firmando pa loco, sin tene cuenta cu e conseho cu e ta ricibi di su departamentonan. Hustamente pa e motibo ey el a puntra den parlamento con e ta screen.
Drs. Mervin Wyatt-Ras pa cuminsa a bisa di ta desapunta con e minister casi un aña y mey despues di e peticion ta acudi na parlamento. E ta preocupa pasobra hopi hende ta sperando riba e decision na DIMAS pa un empleado. E proceso ta dura hopi largo. Tin hopi cos mester cambia, principalmente e forma con pa haci peticion online, cu no ta bay manera mester ta. Y e minister en bes di drecha e maneho, e ta haci politica den departamento. E ta hinca trahadonan den e situacion aki creando un clima toxico unda un ta bringa contra otro. Y despues a cuminsa cu persecucion riba director di e departamento, cu a gana tur su casonan den corte.
Pa parlamentario Aguannette Gunn (MAS) simplemente no tin confiansa mas den Minister Glenbert Croes. E mocion entrega ta splica e motibonan bon cla. P’esey a pidi pa kita e confiansa for di e minister.
A firma e mocion: Marisol Tromp y Aquannette Gunn di fraccion di MAS hunto cu Mervin Wyatt-Ras, Arthur Dowers, Mike Eman y Mike de Meza di AVP. Awo ta cuestion di sinta warda pa wak ken tur ta sostene e mocion pa manda Minister Glenbert Croes cas. Ta di mira si for di oposicion mes lo ricibi sosten di tur parlamentario. No ta un secreto cu recientemente a mira parlamentario independiente, Santos do Nascimento masha cerca di e partido MEP, pues no sa si e lo sostene e mocion pa manda Croes cas.
Te cu atardi laat a vota riba e mocion cu a rechasa cu 12 voto en contra y 8 na fabor.
