Diasabra awor dia 24 di Augustus proximo, Kiwanis Club of Palm Beach lo tin un actividad pa promove uzo di childseat den trafico na Aruba. Un ‘childseat’ ta un asiento di auto pa baby of mucha chikito cu ta protega e mucha den caso di accidente den trafico. Lo parti sticker di conscientisacion di uzo di childseat riba L.G. Smith Boulevard na altura di oficina di Aruba Tourism Authority (ATA) pa 3:30pm.
Pa 5:00pm lo tin un actividad na Nephtali Henriquez Park caminda Kiwanis Palm Beach lo haci entrega di 25 child seat na famianan di menos recurso den comunidad. Tambe lo manda e mensahe pa promove uzo di childseat pa baby y mucha chikito. E campaña di concientisacion aki ta dedica na protega nos muchanan y ta un “signature project” di Kiwanis Palm Beach, lansa durante e aña Kiwanistico 2001-2002, bou di Presidencia di Serge Mansur.
Kiwanis Club of Palm Beach Aruba ta forma parti di Kiwanis International, un organisacion mundial di boluntario dedica na cambia mundo, cuminsando na un comunidad y un mucha. Nan ta un organisacion den crecemento, dedica na yuda muchanan di mundo henter hisando nan calidad di bida.
Pa mas information di Kiwanis Club of Palm Beach bishita www.kiwanispalmbeach.com of riba Facebook Page https://www.facebook.com/kiwanispalmbeach.
