Un reunion cu minister a trece mas claridad tocante e maneho nobo pa Airbnb y otro acomodacionnan turistico na Aruba. Elton Arends a expresa su satisfaccion cu e splicacionnan recibi, specialmente tocante e proceso di registracion y e posibilidad pa inversionistanan pone nan propiedadnan na regla.
Segun Arends, despues di e anuncio siman pasa, tabatin hopi pregunta y incertidumbre tocante kico exactamente registracion ta nifica y cua ta e pasonan necesario pa cumpli cu e reglanan nobo.
Durante e reunion, minister a splica e pasonan cu gobierno ya a tuma y e trabou cu ainda ta sigui pa yuda esnan cu ta activo den e sector regularisa nan propiedadnan y sigui cu nan actividadnan.
Arends a enfatisa cu e sector empresarial no ta contra di regulacion di Airbnb, sino ta favorece un maneho cla y adecua pa pone orden den e sector.
E reunion tabata enfoca principalmente riba Oranjestad, pero San Nicolas tambe ta cay bou di e mesun maneho. Segun Arends, e posibilidad pa e dos centronan di ciudad beneficia di cierto excepcionnan pa algun actividad ta un aspecto positivo pa impulsa inversion y desaroyo.
Arends a trece dilanti tambe e preocupacion tocante e diferencia entre e tempo limita cu inversionistanan tin pa desaroya nan proyectonan y e tempo cu proceduranan gubernamental ta tuma.
A pesar di e puntonan cu ainda mester wordo resolvi, el a expresa su aprecio pa minister pa su empeño y e trabou cu e ta haciendo pa mehora e centronan di ciudad di Oranjestad y San Nicolas.
“Nos a sali hopi positivo awe for di e reunion aki,” Arends a declara, agregando cu nan ta keda pendiente di e siguiente pasonan y e desaroyo di e proceso.
