Awe miembro di parlamento di Aruba, drs. Marisol Lopez-Tromp, e di tres politico cu mas voto personal na Aruba den ultimo eleccion a manda un serie di pregunta den direccion di Minister Dangui Oduber, encarga cu maneho di salud publico riba nos isla. E parlamentario kier sa kico tabata e accionnan cu e mandatario a tuma na momento cu el a tende cu su campañadonan a comete fraude pisa cu asunto di vacuna. E prome indicacionnan ta mustra den direccion cu a purba “tapa cos” pero cu for di DVG mes nan a entrega keho na Landsrecherche, cu a stroba e intencionnan for di esunnan di Cocolishi.
Parlamento obviamente ta preocupa cu e desaroyo aki, den cual tin un cantidad di hende ta cana rond cu un prueba di vacuna, siendo cu nan nunca a vacuna. Esey ta pone cu e cifra cu Gobierno di Aruba ta comparti cu Europa, cu Merca y cu World Health Organization (WHO) no ta veridico y tampoco ta integro. Esey ta hinca henter nos sistema di salubridad den un posicion vulnerabel pasobra no por confia e estadisticanan cu tin riba mesa awo.
Pero, e caso ta bira mas serio, ora cu e prome resultado di e investigacion preliminar ta mustra cu Departamento di Salud Publico (DVG) no tabatin nada di haber cu henter e asunto aki di vacuna, di e Aruba Health App, etc. Ta for di Cocolishi a laga campañadonan, cu despues a bira coordinador scondi bou payroll di DVG, pa nan procesa informacion priva y secreto di pashent den un app. Y ta precisamente ora cu, deliberadamente, a saca un asunto medico for di man di ambtenaarnan y hinca den man di campañadonan cu ta traha riba contract, cu henter e proceso a bay robes. E pregunta ta awo si el a bay robes sin cu e mandatario tabata envolvi of si e tabata mucho cerca di e candela pa no sa kico tabata pasando.
E preguntanan di miembro di Parlamento di Aruba, drs. Marisol J. Lopez-Tromp, cu alabes ta lider di fraccion M.A.S, ta dirigi na Ministro di Turismo y Salud Publico, Dangui Oduber. Den su preguntanan e parlamentario ta desea, via intermediacion di Presidente di Parlamento, pa por haya contesta riba tur e 13 preguntanan pa asina por prepara pa un posibel reunion publico den Parlamento cu lo kier yama pa e mandatario duna cuenta riba e caso aki.
E preguntanan di Parlamentario Marisol Lopez na Minister Dangui Oduber:
- Cua ta e compania y/of kende ta e persona(nan) cu ta responsabel pa e Aruba Health App?
- Dicon e no ta den man y bou guia di DVG?
- Kende (nan) tur tin acceso na e informacionnan di salud den e Aruba Health App y kico ta nan tarea y responsabilidad pa cu esaki?
- Dicon Gobierno y Minister di Salud Publico a opta pa pone e Aruba Health App y e datonan di salud di nos pueblo pa cu resultadonan di test di COViD19 y e datonan di vacunacion den man di un particulier y no di DVG?
- Ki consecuencia e fraude / falsificacion cu e datonan di vacunacion tin pa cu e confiansa cu internacionalmente mester tin den Aruba su proceso- y e datonan di vacunacion como pais y tambe e hecho cu nos datonan mester ta veridico y confiabel?
- Kico Gobierno y Minister di Salud Publico a haci concretamente despues cu e tawata na altura cu tin falsificacion/ fraude cu e datonan di vacunacion?
- Ki dia Minister di Salud Publico a haya sa cu tin fraude y iryegularidadnan ta tumando lugar cu e datonan di vacuna?
- Aparentemente tin centenares o hasta miles di caso individual di fraude cu e datonan di vacuna a tuma lugar y pues tin cantidad di persona envolvi den esaki cu ta registra awor comosifuera cu nan ta vacuna, siendo cu nan no ta. Hopi di nan lo por a biaha uzando QR code falso y tambe uzando datonan falso pa mantene nan den nan situacion laboral, mientras cu otronan cu no por of no kier a vacuna, tawata wordo discrimina pa esaki cu e chens di perde nan trabou. Kico ta Minister di Salud Publico su punto di bista riba esaki y por splica kende (nan) y pakico tin persona cu awe ta sospechoso den caso di fraude di vacuna a haya carta di bon recomendacion pa nan trabou ora cu nan a wordo kita?
- Ken a firma e cartanan di recomendacion aki pa e persona(nan) aki y Parlamento por a haya copia di e carta(nan) aki?
- Con e proceso a bay pa duna nan un carta di recomendacion?
- Departamento di Recursonan Humano a duna conseho riba e cartanan aki o tawata envolvi den e procedura aki?
- Ki confiansa tin internacionalmente awor den Aruba Health App su maneho cu datonan di vacunacion y e QR Code ora cu nos residentenan biaha pa otro pais?
- Minister di Salud Publico por garantisa nos pueblo cu e privacidad di su informacion di su salud ta salvaguardia cu e Aruba Health App?
Tocante e caso Wanglo
Algun siman pasa Ministerio Publico a confirma cu a habri un investigacion bou di e nomber di “wanglo”. Ta investiga posibel iregularidadnan rond di procesonan di test di vacuna y e pruebanan di e testnan haci. A confirma dos detencion caba dia 13 di december 2021 y cu tabatin bista riba algun posibel sospechoso mas. Prome cu Pasco a traslada e dos sospechosonan pa KIA y dia 4 di januari 2022 nan a recobra nan libertad condicional, mientras cu e investigacion ta sigui. E sospechosonan ta na cas bou condicion cu no mag tin contacto cu ningun hende cu ta envolvi den e caso grandi aki di fraude y corupcion cu prueba di vacuna.
