Durante e reunion publico diaranson, unda Minister Ursell Arends a duna splicacion riba e situacion di Serlimar, lider di fraccion di MAS, parlamentario drs. Marisol Lopez-Tromp, a enfatisa cu e problema di Serlimar ta rekeri un solucion urgente. Durante su discurso e parlamentario a conta cu tempo e tabata minister e problema di Serlimar a caus’e hopi anochinan di soño perdi ya cu mester a busca un solucion pa asina haci un opschoning y stop e corupcion cu tabatin den e compania pa hopi aña y cu a causa hopi otro problema mas.
Esencia di e problema na Serlimar ta cu tin dos solucion: Faillissement of prolongacion di e surseance van betaling. Por papia riba diferente topico manera entre otro personal, plan di Parkietenbos y cambio di ley pero e mas importante ta si Serlimar lo wordo declara bancarota of si ta sigui cu e surseance van betaling.
Na mei 2020 e board di Serlimar a entrega un peticion pa un surseance van betaling pa evita cu mester manda tur trahado cas. E decision aki a conta cu sosten di Minister Lopez-Tromp kende e tempo ey tabata e minister encarga cu Serlimar. Ora Minister Lopez-Tromp a tuma e cartera di Serlimar, e situacion tabata asina malo no tabatin otro solucion cu un surseance van betaling.
Pakico? No tabatin placa mas ni pa paga e trahadonan fin di luna. Tampoco tabatin placa pa paga esnan cu e compania mes tabata debe. Un surseance van betaling ta pone cu politica no por mete facilmente mas den e maneho di e compania: Ningun debchi no por sali di e compania sin aprobacion di e bewindvoerder. Un decision cu e coleganan di Minister Lopez-Tromp no a aprecia e tempo ey y tabata un di e motibonan principal pakico a bula su cabes. E surseance ta valido te dia 2 di februari 2022. Si pa e fecha aki no busca un solucion, esaki ta encera cu cos ta pinta scur pa e futuro di Serlimar.
Parlamentario Lopez-Tromp a haci e siguiente preguntanan na Minister Ursell Arends:
- Ta bay nombra un director nobo pa Serlimar mirando cu e director anterior a wordo kita pa mal maneho y falsificacion di diploma? A saca un vacatura nobo pa e funcion aki?
- Kico ta exigencia pa e director nobo? Ta tene cuenta cu good corporate governance?
- Tin un HR consultant nobo na Serlimar y kico ta loke su trabou ta encera y kico el a haci te cu awor?
- Si bin cu un reorganisacion cuanto placa esaki lo bay costa?
- Minister ta sostene e idea di un reorganisacion?
- E reorganisacion aki a tuma luga caba?
- Kico ta e accionnan cu e bewindvoerder a tuma te cu awor pa prolonga e surseance van betaling?
Parlamentario Marisol Lopez-Tromp ta kere cu e surseance van betaling tabata un bon decision pa Serlimar mirando cu lo tin miho control riba e forma con placa ta wordo gasta den e compania y pa evita decisionnan robes, nombracionnan politico y mal maneho. E tempo ey hues a duna e hunta, e director Anko Koopmans y Minister Lopez Tromp razon tambe cu un vonnis na fabor di un surseance van betaling. Si e hues lo no a aproba e surseance van betaling aña pasa, awe e trahadonan lo tabata riba caya sin trabou.
Pa e motibo aki e parlamentario ta keda puntra Minister Ursell Arends kico ta e exigencianan y condicionnan actual pa prolongacion di e surseance van betaling. E board di e tempo ey ya ta practicamente no existente ya cu ta un miembro so a sobra, cu ta ing. Roland Croes, director di Setar y cu den e board ta representa ATIA. Otro pregunta cu parlamentario Lopez-Tromp a haci ta pa sa ki pasonan ta bay tuma pa nombra mas hende capacita y segun reglanan di good governance den e board di Serlimar.
Alabes a puntra e minister tambe si ta bin cu cambionan di ley pa regula e aspecto di tarifa di Serlimar y si lo bay laga Serlimar para di berdad riba su mes pianan y hiba un maneho drechi. Kico a acorda encuanto Serlimar pa loke ta e consehonan di CAFT cu no kier pa gobierno keda hinca placa den Serlimar? Tambe a puntra kico ta bay haci pa cumpli cu tur e debenan cu Serlimar tin habri ainda y no por paga. Por ultimo a puntra kico a para cu tur e investigacionnan, cu bou maneho di Marisol Lopez-Tromp a cuminsa na 2020 y ainda no a tende kico a sali afo di esakinan of si ainda e investigacionnan aki ta andando. Minister Ursell Arends sa si e investigacionnan aki ta afgerond y kico a sali afo di esakinan? Kico ta bay haci cu e nombracionnan politico cu den transcurso di añanan a bin tuma luga den Serlimar?
Minister Arends a contesta cu pa fin di e aña aki e lo por duna un contesta riba e desaroyonan di e investigacionnan cu ta andando desde 2020 den Serlimar. Pa loke ta e presupuesto, Minister Arends a menciona cu lo duna un bista den e presupuesto aunke cu no tin un suma specifico poni pa Serlimar pero cu si a cuantifica e servicionan di e compania. Y cu aunke cu Serlimar no tin placa lo busca un director nobo pa maneha e compania pero cu lo warda te dia 2 di februari 2022 prome cu tuma desicionnan tambe pa loke ta regarda personal cualifica pa maneha e luga.
