Manera tur aña, Maria College MAVO tin un tema cual ta carga pa full un aña. E ta Maria gaat op reis. A base di esey tur aña ta bin cu algo cu ta complementa e tema, segun Ferdinand Franca, docente di CKV.
E aña aki a dicidi pa bin cu e tema di Aruba, ya cu pa nan ta hopi importante pa e muchanan tambe haya sa algo mas di Aruba. Tin ora ta enfoca riba diferente pais di afo y ta lubida riba nos dushi baranca Aruba. E aña aki a dicidi pa bin cu e tema Turista riba mi Isla.
E tema
Normalmente tur ta pone cabes hunto pa asina haya un tema cu ta satisface tur. Manera menciona, e aña aki a bisa cu ta un aña cu mester enfoca mas riba loke ta nos dushi isla Aruba. Y tambe ta haya cu durante añanan, ta duna diferente pais e enfoke. A pensa cu a yega tempo pa e muchanan sa kico ta come y bebe di Aruba.
Mas cos tras di e tema
A base di e tema aki, ta bay traha cu proyecto. Maria College MAVO ta traha hopi cu proyecto. Tur proyecto ta bay traha hunto y ta purba pa cada materia uni cu un otro materia y asina por haci un tema bira mas grandi y tambe complementa otro, pa asina e muchanan por tin 10 diferente proyecto pa traha, pero ta traha cinco proyecto, pero grandi.
Esey pa e scol ta importante pa e tema bay full den e proyecto. Tur e proyectonan lo bay tin di haber cu Aruba.
Studiantenan riba caya
E studiantenan tabata riba caya awe y tabata tin di haber cu e tema. Segun Franca kier a haci’e algo creativo y a dicidi haci un Scavenger’s hunt, pa asina e muchanan por bay busca den nos mesun ciudad Oranjo, diferente monumento y por a cera conoci caba cu e edificionan bieu, esta nos herencia cultural. Esey tabata e enfoke pa asina nan por bay. Por ehempel Franca a para na Kerki Protestant y hopi no a realisa cu e misa ta un monumento y ta un parti valioso di nos cultura. Ta p’esey nan tabata kier pa nan busk’e. A duna nan pista y a haci’e como un buskeda di tesoro. E ora ey nan mester a busca e tesoro, mirando cu e ta un tesoro pa nos y tambe nan mester a busca e pirata. Nan mester a saca potret cu e pirata pa asina nan haya un punto pa loke ta e Scavenger’s hunt.
Mensahe
Meneer Franca tabata tin un mensahe, cu ta stima bo mesun pais, stima bo propio idioma, stima bo herencia cultura. Tur esaki e ta haya cu poco poco ta bayendo perdi, durante tur e añanan. P’esey a dicidi e aña aki pa bay mas riba esey, pa por a haya un amor pa bo mesun isla, pa bo identidad.
