Pa algun dia caba usuarionan di e compania di Servicio di Telecomunicacion Aruba (SETAR) ta haya nan mes ta experiencia un serivicio cu ta laga di desea. Riba 12 di September den oranan di atardi, SETAR a experiencia un fayo completo cu a laga clientenan practicamente sin por a comunica.
E red di GSM tabata completamente for di servicio, celularnan riba “No Signal”. Fibernet, Cablenet a cay, algun canalnan riba CableTV analogo y tambe digital tabata for di aire. Ora a yama call center di SETAR, no tabatin contesta mes. Yamada na telefon fiho no tabata traha optimal hopi number tabata sona manera nan ta ocupa. Usuarionan manera medionan di comunicacion e.o. tambe companianan di siguridad tabatin problema cu radio di Tetra cu ta un manera crucial pa comunica cu otro. Na SETAR mes por a ripara cu e fayo aki a afecta nan sistema di siguridad pues trahadonan no por a swipe nan badge ni pa drenta nan mesun edificio.
Algun ora despues SETAR a publica un comunicado cu e fayo a sosode debi cu a haci un upgrade riba e red y den menos di ora a resolve e problema.
E pregunta ta keda con por ta posibel cu memey den oranan di trabou ta haci un “upgrade” asina cu consecuencianan ya menciona. Comercio tambe ta keda stroba pa falta di conectividad pues tabatin varios machine POS cu no por a pasa transaccionnan bancacrio. Ta masha normal cu “upgrade” ta sosode den oranan laat di anochi of madruga, pa e efectonan por ta minimo riba operacionan esencial di diferente clientenan riba e red di SETAR.
E di dos pregunta y preocupacion ta e hecho cu e fayonan menciona no ta afecta solamenta un servicio pero tin un efecto domino cu ta pone otro servicionan di SETAR tambe ta cay afor. Ta practicamente normal caba cu interferencia di operadornan di rednan celular for di pais bisiña Venezuela ta afecta e frecuencia di SETAR. Pues esey facilmente por splica dicon usuarionan ta experencia un servicio lento di LTE pero no ta splica con porta cu servicionan cu ta bay riba kabel pues CableNet, FiberNet y hasta ADSL ta cay afor.
Diahuebs anochi 26 di September den oranan di anochi e mesun situacion a bolbe presenta aunke e biaha aki pa algun minuut. E servicio di telefon celular si a keda instabiel, pues hasta den oranan di mainta di diabierna e red tabata algun caminda riba 3G y no por a haya bon cobertura di LTE. Mescos cu e prome biaha, ningun hende na SETAR tabata parce di ta comunicabel pa duna un splicacion riba e situacion fastioso aki.
Awendia den un mundo cu ta depende di comunicacion ta parce di ta dificil di por confia riba un solo operador di comunicacion sea ta pa internet, tv of celular. E fayonan ultimamente ta pone realisa tambe con fragil e conectividad aki ta y con e ta afecta nos bida diario. Pero pakico SETAR ta silencioso riba e fayonan aki?
