E pregunta di parlamentarionan di MEP direccion di nan partner den e coalicion ta sigui drenta tras di otro. E biaha’ki parlamentario Marco Berlis a cuestiona cu e representantenan di pueblo te ainda no a haya e rapport forensico di SERLIMAR.
E departamento di desperdicio aki ta un dolor di cabes pa tur gobierno. A trece varios cambio for di departamento di gobierno pa un empresa sui generis, pero independiente ainda SERLIMAR no a logra funciona.
Berlis a haci un serie di pregunta cu ta relaciona cu e rapport forensico di investigacion Grant Thornton di Serlimar 2020 na Minister di Transporte, Integridad, Naturalesa y Ouderenzaken. Aki mester mira e fecha bon: 2020. Pues tres aña pasa.
Den su prome pregunta e ta referi na un reunion publico di december, 2021. Eyden Minister Ursell Arends “a declara cu ta haciendo un investigacion forensico den Serlimar. Nos a haya sa via boca di minister cu esaki a finalisa na januari 2023, si mi no ta ekiboca. Te dia di awe nos no a haya nada mas y no a duna un fecha cu lo entrega e rapport aki den man di Parlamento.” Como representante di pueblo, ta pidi pa e mandatario informa ki tempo “nos lo haya un copia di e rapport aki?”
Tambe a referi na un entrevista e luna aki di ex-minister Otmar Oduber, kende tabata zwaai cu un rapport forensico cu a finalisa na 2020, y cu e minister di e tempo ey, Marisol Lopez Tromp, tambe a haya. Esaki ta un rapport cu Grant Thornton a traha. Den cuadro di esey el a puntra “Minister, Parlamento por a haya copia di e rapport aki cu ta cubri e periodo di 2005-2019?”
E kier sa tambe si ta berdad cu a traha e rapport forensico aki riba ordo di ex-minister Otmar Oduber. Ta pidi pa haya un copia di e rapport aki tambe, esta di Grant Thornton di 2020. Adicional, kier sa cuanto e rapport aki a costa Gobierno.
Loke cu a hala atencion di hopi hende di e conferencia di e ex-mandatario ta e punto riba e debe cu Gobierno di Aruba tin of tabatin cu SERLIMAR. El a hala atencion di Marco Berlis tambe, kende tabata kier sa di Minister Ursell Arends, kico tin di berdad cu e echo cu den e periodo den e periodo di 2005-2019 tabatin un debe asina grandi cu SERLIMAR.
Tambe a el a insinua cu ex-minister Marisol Lopez Tromp e tempo ey ya a actua contra ley hibando Serlimar den Surseance van betaling, basa riba e información di e rapport forensico aki. Minister por confirma of contradeci esaki y splica pakico, e ta puntra.
Pa loke ta futuro di e compania aki, el a referi na declaracion haci door di e propio Arends, cu ta kere cu SERLIMAR ta cuminsa para riba su propio pianan y ta bayendo den un bon direccion. Pa e motibo aki kier pa Parlamento haya un bista di esaki y con lihe minister ta premira e recuperacion aki pa SERLIMAR r paga su mesun gastonan sin keda cu un debe.
Otro pregunta ta riba expresion di Lopez Tromp cu tin Spirito den e compania. E kier sa kico tin di berdad den esaki.
Y tambe a pidi un reaccion di e mandatario riba comentario di Otmar Oduber cu pa motibo cu Marisol Lopez Tromp a pone Serlimar den surseance van betaling, esaki a perhudica hopi comerciante y trahadonan.
