Ultimo dianan por a scucha hopi rumor riba reunionnan tumando luga riba e tema di matrimonio di mesun sexo. Aunke cu e decision di casacion cu ta sperando riba dje ta bini te final di mei, algun miembro di parlamento a pidi pa adelanta e tema aki den parlamento.
Principalmente Misha Raymond (RAIZ) a cuestiona di con e peticion, cu el a firma, pa yama reunion riba e tema aki no a tuma luga ainda. El a cuestiona e Presidente di Parlamento riba e tema aki. E Presidente di Parlamento, mr. Edgard Vrolijk, a bira contesta Misha cu mester laga e comision, cu ta reuniendo cu stakeholdernan caba cu su trabou y ademas mester mira ora cu tin espacio riba e agenda di parlamento.
Den combersacion cu parlamentario Marco Berlis di fraccion di MEP, el a bisa cu e no ta altura di ningun reunion pafo di parlamento cu por a tuma luga. Inicialmente hasta el a kere cu ta un reunion entre e ministernan di e dos partidonan cu ta forma coalicion. Ora cu a inform’e cu lo tabata un reunion entre e parlamentarionan, el a bisa “mi no tabata den e reunion, si el a tuma luga. Si esey a sosode, e lo ta probablemente algo cu a haci pa purba yega na otro. Pero, manera mi a bisa, no tabata parti di e reunion aki pa por duna comentario riba dje.”
Pero si e parlamentario a enfatisa cu “mi pensamento y decision ta hopi cla. Esey nunca lo bay cambia. Pueblo sa esey, pasobra mi ta un homber di principio y conviccion. Mi punto ta hopi cla y mi ta contra e ley aki.”
