Gabinete Wever-Croes I-II a demostra di por desplega liderazgo fuerte den temponan decisivo, nunca antes bisto y memey di calamidad global. Liderazgo no ta ora bo tin djis un titulo.
E ta demostra den e forma cu bo ta lidera, duna ehempel, organisa y maneha e pais na TUR momento. Cu tur siguridad, e 7518 votonan deposita pa Prome Minister Evelyn Wever-Croes y e 20701 votonan pa partido MEP no tabata djis voto di aprobacion di maneho di un pais, pero sigur aprobacion di e maneho complica di un pais den un crisis economico y pandemia mundial.
Ademas mester subraya cu Gabinete Wever-Croes I-II a bin haya nos pais na rand di bancarota. Rapport di CBA, CBS, y ATA entre otro ta demostra esaki claramente y ta obtenibel riba nan website pa pueblo por wak. Nos gobierno na 2017 a hereda un economia den ruina, un CAft y LAFT pa e maneho desastroso di 8 aña di gobierno di AVP y asina mester a cuminsa pone ordo y trece speransa den un panorama di realidad caotico y scenario sumamente scur.
Pa colmo awo nos mester lidia cu e consecuencianan economico mundial pa via di e guera na Ucrania cu a causa inflacion mundial riba tur producto cu nos ta importa, specialmente gasolin. Sri Lanka ta spaar gasolin pa via di e costo di esaki. E pais aki casi no tin e finansa pa importa gasolin y den tur pais rond mundo esaki a subi na prijs record. No ta scenario desea ni ideal pa un gobierno sinta den dje. Pero si un scenario ideal pa lider autentico lanta y cu tin e curashi pa tuma decisionnan impopular pa otro, pero necesario pa e avance di e pais. Nos no por sigui pusha problemanan pa futuro, nos mester resolve y pone accion awe. Decision y accion cual no tur hende lo ta di acuerdo cu ne mesora pa via di politica barata di oposicion. Sinembargo pueblo lo sa di compronde ora tur lo wak e frutanan positivo den futuro.
Historia a mustra con un ex-lider debil, Mike Eman, sin curason pa pueblo a dobla dilanti un crisis cu e mes a crea. Historia ta mustra nos cu e ex-lider aki a huy, yora y bebe Ensure pa via di e decisionnan desastroso cu e mes a tuma. Un ex-lider cual su legado lo conta con el a endeuda, debilita, empobrese, apoya y sostene corupcion, corta inversion, malgasta fondo publico, invita Hulanda bin kita nos autonomia cu CAFT y e LAFT y a bay bebe Ensure bao di palo pa su accionnan descabeya. Historia di nos pais ta siña nos cu nunca mas nos kier ni mester un lider asina aki. Un lider cu awe ta pretende di tin TUR e contestanan p’e crisis di awe pero nunca ta presenta esakinan den ningun reunion, ni publico ni tra’i porta. E unico solucion di partido AVP ta baha Gobierno pa nan mes goberna, pero goberna con? Ta ocho aña desastroso el a laga atras den historia y Mike Eman a pasa pa pasado, sinembargo e debe cu el a laga atras t’ey pa nos paga te cu 2044! Nos pais mester paga 100 miyon florin di awo padilanti tur aña. Otro desafio mas pa nos liderazgo actual.
Sinembargo awe nos tin un gobierno y parlamento den coalicion cu ta mantene su bista riba e bienestar, progreso y restauracion di nos pais memey di e pio crisis den su historia. Memey di e calumnia di cierto medionan y politica barata di MAS y AVP, nos lo continua di mustra liderazgo y caracter.
