Den luna di September Marc Farro a defende su Tesis exitosamente dilanti di e comite di graduacion cu tabata consisti di dr. Mieke de Droog, Judelca Briceño MSc y Melitza Gietel MSc; Director di Operacion di Recursonan Humano na Marriott Aruba & Stellaris Casino.
Prome cu el a studia na Universidad di Aruba, Marc a studia na EPI Ciencia y Tecnologia. Den e ultimo 4 añanan como studiante di Organization, Governance y Management (OGM), Marc a desaroya su mes riba nivel personal, profesional y riba tereno academico. Marc mes ta haya cu e la bira mas critico, proactivo y mas sigur di su mes. Durante di su presentacion, Marc a laga e publico sorprendi cu su abilidadnan verbal y di presentacion. Marc practicamente sin wak su slides por a splica e partinan mas importante di su investigacion, den exactamente 10 minuut. El a demostra cu e ta tribi di papia y comparti su ideanan cu un audiencia cu a consisti di miembronan di su famia, amigonan y profesionalnan.
Pa e diseño di investigacion di su Tesis, e no a tuma e caminda facil, no solamente el a hana un bon cifra, pero e tabata curioso y motiva pa investiga e topico di maneho di rendimento y su influencia riba e rendimento di trahadonan di Marriott Aruba & Stellaris Casino. Su curiosidad den e topico aki a crece durante su di tres aña di stage na e departamento di recurso humano di e organisacion aki.
Su investigacion a evalua e sistema di maneho di rendimento y su influencia riba e rendimento di trahadonan den tur tres propiedad di Mariott Aruba & Stellaris Casino. Marc a investiga e sistema di maneho di rendimento basa riba tres topico, entre otro, e diseño di e sistema, e implementacion di e sistema, y e influencia di liderazgo. E pregunta di investigacion principal cu e investigacion aki a purba contesta tabata: “Ki impacto e sistema di manehi di rendimento tin riba empleadonan di Marriott Aruba?” E investigacion aki tabata uno qualitativo cu entrevistanan semi-structura. Tres grupo cu tabata consisti di empleadonan, managers, y representantenan di recursonan humano di e tres propiedadnan di Marriott a participa den e investigacion. E resultadonan a indica cu e sistema di maneho di rendimento di Marriott Aruba tin un impacto significante riba e rendimento di e empleadonan causa pa e manera cu e ta diseña, implementa, maneha y apoya pa e departamento di recurso humano. E diseño o sea e maneho a cambia den e ultimo añanan y a comunica e cambionan aki ora di implementacion. E resultadonan ta mustra cu aparte di e diseño, implementacion y liderazgo di e sistema di maneho di rendimento, factornan humano tambe por tin influencia riba e rendimento di e empleadonan. Ademas, e resultadonan no ta mustra diferencia den e diseño, implementacion y/of maneho di e tres propiedadnan di Marriott Aruba. E motibo por ta cu tur tres propiedad ta experiencia e mesun cultura y metanan di organisacion, cu enfoke riba maneho di empleado, implementacion y tipo di liderazgo.
Marc a gradua den 4 aña cu un lista di cifra impresionante. Universidad di Aruba, particularmente e departamento di ‘Organization, Governance, and Management’, ta felicita Marc cu e logro aki y ta desea e tur clase di exito pa su futuro carera. Pa mas informacion riba e estudio OGM, bishita e pagina di web di Universidad di Aruba na http://www.ua.aw/OGM y e pagina di Facebook cual ta https://www.facebook.com/pages/University-of-Aruba-OGM-Organization-Governance-Management-FAS/
