Un rato pasa Minister Plenipotenciario di Aruba, Guilfred Besaril, a caba di anuncia su retiro na e personal di Arubahuis. El a menciona algun argumento financiero-labora, manera entre otro di no ta haya “kindertoelage” como motibo pa e retira y regresa Aruba. Si tur cos ta bon, desde dia 1 di juli 2022, Juan “Ady” Thijsen lo tuma e funcion over y Besaril lo regresa Aruba. E no a menciona si e ta sigui den politica, ni na cua departamento e lo bay traha. Su ultimo funcion, prome cu a drenta politica tabata di “Polis di Bario”.
No ta di awo, sino ta for di algun luna caba tin indicacion riba posibel iregularidad na Aruba Huis. Un ke otro lo por tin di haber tambe cu huurmento di un cas luhoso den e bario elito Wassenaar na Hulanda, uzo di e cas di Gobierno di Aruba door di Glenn Ling en bes di e minister mes. Tambe a menciona uzo di creditcard di Arubahuis pa “wine and dine” sin cu por hustifica y hasta lo a drecha cura di e cas unda e minister ta biba, siendo esaki ta gehuur.
Minister-president mr. Evelyn Wever-Croes a confirma cu e tambe a haya e señalnan ey y a instrui Centrale Accountants Dienst (CAD) pa conduci un investigacion eynan. Esey a sosode tambe y hasta a envolvi Departamento di Recurso Humano (DRH) cu a bay haci un “doorlichting” te na Den Haag. Kico a sali for di e investigacion no ta conoci ainda of gobierno no a menciona. Tampoco si nan a entrega keho penal na Landsrecherche pa e posibel iregularidadnan eyden.
Locual si a nota cu Gabinete Wever-Croes a haci ta, a kita e director adhunto di Cas di Aruba for di su funcion, esta Glenn Ling. Aunke cu a no ta encarga cu e maneho diario mas, a dun’e un contract y manten’e eyden keto bay. Tambe a duna Glenda Hernandez un contract, despues di a baha cu pensioen na Aruba pa e bay reorganisa henter e departamento.
Durante su reunion cu personal di Arubahuis awe mainta na Hulanda, e mandatario a bisa di lo emiti un comunicado di prensa pa 2:00 pm (ora di Aruba). Eyden probablemente lo por tin mas informacion riba e retiro boluntario aki di e minister y pa mira kico lo bira di su futuro politico y carera profesional. Den pasado a purba pa Ady Thijsen a bira minister plenipotenciario caba pero no a logra pa motibo di screening. Si el a regla su asuntonan e biaha aki si, no ta conoci.
Tocante Juan Thijsen
mr. Juan Edberto “Ady” Thijsen ta casa y tin 4 yiu y 2 nieto. El a studia ley y ta un abogado di profesion, specialisa den leynan laboral y derecho constitucional. El a drenta arena politico na aña 2005 ora a subi lista di MEP. Den su prome salida el a logra 818 voto, esun mas hopi te dia di awe! Den eleccion na aña 2009 el a cay den voto y a yega 414 voto, net mita. Den eleccion di 2013 el a crece y yega 475 voto mientras cu den e eleccion di 2017 el a bolbe crece y a yega 511 voto riba su nomber. Mester menciona cu den e ultimo eleccion aña pasa, el a bolbe cay drasticamente y a haya no mas di 183 voto riba su nomber. Na 2017 el a ocupa e puesto di Presidente di Parlamento di Aruba, aunke cu su preferencia lo tabata e puesto di Minister Plenipotenciario di Aruba na Hulanda, pero esey no a logra e tempo ey. Awo den un di dos intento ta purba nombr’e den e funcion entrante otro luna.
Tocante Guilfred Besaril
Guilfred Besaril, kende originalmente ta un Polis, a drenta sindicalismo y desde aña 2013 ta milita riba lista di MEP pa cual el a drenta Parlamento. Den su prome eleccion el a logra 833 voto, den eleccion 2017, su votonan a baha na 508 y den eleccion na juni 2021 a logra 203 voto individual. Diamars dia 21 di september 2021, Conseho di Minister a ratifica su nombracion di dia 20 di november 2017 como Minister Plenipotenciario, staciona na Den Haag, Hulanda. Guilfred Besaril a reemplasa Juan David Yrausquin, cu a tuma e funcion over despues cu Alfonso Boekhoudt a tuma retiro pa bira Gobernador di Aruba.
Tocante Minister Plenipotenciario di Aruba na Hulanda
Minister Plenipotenciario di Aruba na Hulanda actualmente ta Guilfred Besaril, el a huramenta dia 20 di november 2017. Un Minister Plenipotenciario no ta un “Minister” igual cu e otronan pasobra e no ta responsabilisa na Parlamento, sino ta raporta directamente na e Minister Presidente. E ta forma parti di Conseho di Minister di Reino na Hulanda pero no ta forma parti di Conseho di Minister di Aruba. Por invit’e pa atende si ta necesario.
E lista di Minister Plenipotenciario ta data desde nos Status Aparte, ora cu John Merryweather a asumi e funcion como e prome GevMIN di Aruba na anja 1986.
- John Merryweather (PPA), 10 di januari 1986 pa 11 di februari 1989.
- Roland Lacle (MEP), 9 di februari 1989 pa 7 di maart 1991.
- Ella Tromp-Yarzagaray (MEP), 8 di maart 1991 pa 1 di maart 1993.
- Candelario “Booshi” Wever (MEP), 2 di maart 1993 pa September 1994.
- Mito Croes (AVP), September 1994 pa 30 di october 2001.
- Ella Tromp-Yarzagaray (MEP), 30 di october 2001 pa 7 di november 2005.
- Frido Croes (MEP), 8 di november 2005 pa 31 di october 2009.
- Edwin Abath (AVP), 1 di november 2009 pa 13 di november 2013.
- Alfonso Boekhoudt (AVP), 14 di november 2013 pa 1 di november 2016.
- Juan David Yrausquin (AVP), 16 di november 2016 pa November 2017.
- Guilfred Besaril (MEP), 20 di november 2017 te awendia.
Por nota cu den historia di Ministernan Plenipotenciario na Hulanda, cu ta Ella Tromp-Yarzagaray Y Guilfred Mesaril so a ocupa e puesto na dos ocasion, aunke cu den ambos ocasion, no a bay dos periodo completo.
