Diasabra ultimo Kiwanis Club of San Nicolas a organisa e prome edición di “Raising Princess into Queens – Being Me & Loving It!!!”. E tabata un evento organisa pa empodera e mucha muhenan di nos isla, door di diferente topico di interes pa formacion di nos hobennan.
E evento a tuma luga na Filomena College Mavo y a conta cu 52 participante, di tur parti di nos isla. Endrah Richardson–Gumbs presidente di Kiwanis San Nicolas, a habri e mainta yamando tur participante bonbini y a enfatisa n’e hobennan cu obstaculo por wordo venci cu un actitud positivo. A demostra esaki door di bisa e muchannan: “Si mi no a bisa boso, boso no tabata sa cu mi a sali for di cas cu dos diferente sapato bisti”. Un momento chistoso, pero impactante presenta door di presidente Endrah.
E participantenan a wordo sopresa cu un bishita special door di nos Prome Minister, mr. Evelyn Wever-Croes. Minister-president a duna un discurso elocuente y a comparti algun experencia personal cu e participantenan.
Otro parti special ta na momento cu director y sub-director di Filomena College Mavo, juf. Raquel Lampe y juf. Joraine Oduber a yama tur nos hobennan bonbini na Filomena. Juffrouw Lampe tambe a conta un storia personal con el a vence obstaculo pa awe ta para ey como director di dicho scol. “Mi no a haci e miho escogencia ora mi tabata mas jong, pero mi a para pa nan y na edad di 30 aña mi a bay scol bek. E tabata un periodo nervioso y mi a logr’e”, ta locual juffrouw Lampe a comparti. Cu e conseho aki na e hobennan, Lampe kier a enfatisa cu si nan kier logra algo, nan concentra cu siguransa na e meta y nan lo logra esaki.
Siguientemente, e participantenan a atende diferente sesion. E prome tabata “Salud Mental”; e parti di “Being Me & Loving It! Guia door di Charisse Hoen, Dahariana Evertsz y Empowerment Queen, Nicole Godett.
Tambe e participantenan a haya oportunidad pa atende 3 diferente sesion. ‘Feminine Hygiene’ patrocina door di Compra Aruba cu nan producto Always. Jadira Leter hunto cu su asociadonan di Famia Planea a comparti e importancia di un higiena limpi, specialmente durante nan periodo. Erika representante di Always a duna tambe splicacion encuanto di tur e producto nan cu Always ta ofrece. Always activamente ta educando nos hobennan cu nan programa #EndPeriodPoverty. Kiwanis San Nicolas ta hopi agradeci cu Ana Maria Ramirez y Always Aruba pa brinda e participantenan e oportunidad aki door di yuda y papia di menstruacion.
Nos Miss Aruba, Thessaly Zimmerman a duna nos participante un sesion di etiquette. Den un manera interactivo y educativo e participantenan a siña encuanto di etiquette y nan comportacion corporal.
E di tres sesion presenta pa miembro di Kiwanis San Nicolas Esther Emerencia–Gomes hunto cu su ruman Sarah Gomes conocI como “The Gomes Sisters”. Nan a presenta “Con bo ta presenta bo mes”, tanto profesionalmente pero tambe cu e toke di fashion. Nos mucha muhenan a encanta e sesion aki.
Pa conclui e mainta exitoso aki, O’Niels Caribbean Kitchen y Neighba, a percura pa un suculento almuerzo. Danki pa e contribucion aki di O’Niels y Neighba. Participantenan por a sinta na mesa pa saboria e almuerzo y comparti nan experiencia di e mainta cu e presentadornan y demas miembro femenino di Kiwanis San Nicolas. Tambe un gradicimento na Mercal Trading N.V. pa nan contribucion na e bunita evento aki.
Y pa despedi den un forma amical, Giandra de Cuba di Level Up Leadership & Personal Development a comparti tambe su experiencia personal como empresario cu e hobennan. Cu hopi interas y empodera, nos hobennan a despedi di e mainta educativo y exitoso aki.
